मधेस प्रदेशका मुख्यमन्त्री यादवले गरे जनस्वास्थ्य प्रयोगशालाको निरीक्षण

जनकपुरधाम । मधेस प्रदेशका मुख्यमन्त्री सरोजकुमार यादवले प्रदेश जनस्वास्थ्य प्रयोगशालाको निरीक्षण गरी सेवा प्रवाहबारे जानकारी लिएका छन् ।  प्रयोगशालाले प्रदान गरेको सेवाबारे चासो लिँदै मुख्यमन्त्री यादवले सोमबार बिहान त्यहाँ पुगेर सेवाग्राहीसँग सेवा प्रवाहबारे जानकारी लिएका हुन् ।  

एउटामात्र काउण्टर भएको भन्दै सेवाग्राहीहरुले  गुनासो गरेपछि मुख्यमन्त्री यादवले काउण्टर सम्बन्धी समस्या समाधान गर्न प्रयोगशालाका निर्देशक डा।श्रवण मिश्रलाई निर्देशन दिए । सेवाप्रवाहमा तदारुकता ल्याएर सेवाग्राहीको काम छिटो छरितो गर्न मुख्यमन्त्री यादवले निर्देशक मिश्रलाई निर्देशन दिए ।

प्रदेश जनस्वास्थ्य प्रयोगशालाले सुलभ दरमा ल्याब सम्बन्धी सेवा प्रदान गर्दै आएको छ । प्रदेश सरकारको लगानीमा सञ्चालित उक्त प्रयोगशालाले दैनिक सयौँ बिरामीको जाँच गर्दै आएको छ ।