सिरहा खिरौनाका इन्चार्ज यादवको संलग्नतामा भित्र्याएको लाखौंको अवैध कपडा राजस्व विभागद्वारा बरामद

सिरहा, असोज १३ । सिरहास्थित बोर्डरबाट ५० लाख मूल्य बराबरको अवैद्य कपडा बरामद गरिएको छ । शुक्रबार राती राजस्व अनुसन्धान कार्यालय इटहरीको एक टोलीले सिरहाको एक विद्यालयमा लुकाई राखिएको लाखौँको कपडा बरामद गर्न सफल भएको हो ।

विभागको कर्मचारी टोलीले शुक्रबार राति सिरहाको माडर भन्सार नाका नजिकैबाट झन्डै ५० लाख रुपैयाँ बराबरको चोरीको कपडा बरामद गरेको हो । दशैँमा बिक्री गर्ने उद्धेश्यले स्थानीय चन्द्रनारायण माविको प्रांगणस्थित आँपको बगैंचामा थुपारिएको कपडा सुराकीको आधारमा इटहरी कार्यालय प्रमुख सुरेश आचार्यको नेतृत्वमा गएको सशस्त्र प्रहरीसमेतको टोलीले नियन्त्रणमा लिएको हो ।

सर्टिङ सुटिङका कपडा, सारी, तयारी पोसाक लगायतका सामान बरामद गरिएको छ । सामान इटहरी कार्यालयमा लगेर यकिन गरिने जानकारी आचार्यले दिए । राजस्व अनुसन्धान विभागका महानिर्देशक नवराज ढुंगानाका अनुसार सीमामा ठूलो परिमाणमा कपडा संकलन गरेर काठमाडौं ल्याउने तयारी भएको सूचनाका आधारमा कपडा बरामद गरिएको हो ।

खुला नाका भएकाले दसैंलाई लक्षित गरेर चोरी पैठारीबाट कपडा संकलन गरेर व्यापारीले ट्रकमा राख्ने तयारी गरेका बेला बरामद भएको हो । केही सामान भने बरामद हुनु अगावै ट्रकमा लोड गरेर अन्यत्र लगेको स्रोतले बतायो । केही समयअघि उक्त कार्यालयले ११ गाँड कपडा सोही स्थानबाट बरामद गरेर एक जनालाई धरौटीमा छाडेको थियो । उक्त सामान व्यक्तिको घरबाट बरामद गरिएको थियो ।

व्यक्ति पक्राउ गर्ने र मुद्दा चलाउने भएपछि तस्करहरूले चोरीको सामान खुला चौरमा संकलन गरेर ट्रकमा लोड गर्न थालेका हुन् । महानिर्देशक ढुंगानाले चाडबाडमा खुला सीमाबाट चोरी पैठारी बढ्ने भएको सतर्कता अपनाइएको बताए ।

कपडा भित्र्याउन खिरौना प्रहरीका ईन्चार्ज दुर्गा यादवको संलग्नता

नेपाल–भारतसीमा स्थित रहेको खिरौनाका ईन्चार्ज दुर्गा यादवको विशेष संलग्नतामा सो लाखौँको कपडा छिराईएको जनाईएको छ । बोर्डरमै रहेको प्रहरी चौकीको नाक अगाडीबाट ट्रकभरिको समान ल्याउन सम्भव नै नभएको अवस्थामा ईन्चार्ज यादवको संलग्नतामै सो कपडा आएको बताईएको छ ।

विगत एक सातादेखिको कसरत गरी ईन्चार्ज यादवले सो कपडा नेपाल भित्र्याउन तस्करलाई मदत गरेको बताईएको छ । काठमान्डौँ पठाउने तयारी गरिएको सो लाखौँको कपडाको लागि ईन्चार्ज यादवले पनि १० लाख रुपैयाँ लिएको श्रोतको दाबी छ । ईन्चार्ज यादवले ३ ट्रक कपडा बापत १० लाख रुपैयाँमा डील गरेको बताईएको छ ।

ईन्चार्ज यादवले एक्लै १० लाख रुपैयाँ खाने भएपछि उनकै कर्मचारीले माथिल्लो निकायमा खबर पुर्‍याएको दाबी स्रोतको छ । ईन्चार्ज यादवले यसअघि पनि करोडौँको सामानलाई हरिझण्डी दिने गरेका छन् ।