राप्रपाको केन्द्रीय कार्यालय भवन भत्काउनबाट पछि हट्यो महानगर

काठमाडौ, साउन १६ । राष्ट्रिय प्रजातन्त्र पार्टी (राप्रपा)को केन्द्रीय कार्यालय भवन हटाउने निर्णयबाट काठमाडौं महानगरपालिका पछि हटेको छ । जिल्ला प्रशासन कार्यालय काठमाडौंमा सोमबार भएको छलफलमा राप्रपाले २१ दिनभित्र आफैँ कार्यालय खाली गर्ने सहमतिपत्रमा हस्ताक्षर गरेपछि महानगर पछि हटेको हो ।

महानगरका प्रवक्ता नवीन मानन्धरका अनुसार २१ दिनभित्र राप्रपा आफैँले कार्यालय खाली गराउने भन्दै समय मागेका छन् । उनले भने, ‘उहाँहरूसँगको सहमतिअनुसार हामी कुर्छौँ ।’ सोमबार दिउँसो भएको छलफलमा महानगरका प्रतिनिधि, सुरक्षा निकायका प्रतिनिधि, राप्रपाका प्रतिनिधि र काठमाडौंको सिडिओ लगायतका व्यक्तिहरु उपस्थित थिए ।

महानगर प्रहरीले अवैध रूपमा बनेको राप्रपाको पार्टी कार्यालय भवन सोमबार दिउँसोदेखि नै भत्काउन लागेको थियो । आफ्नो कार्यालय भत्काउन लागेको भन्दै राप्रपाका नेता तथा कार्यकर्ताले विरोधस्वरूप सडकमै गाडी तेर्साएर अवरोध गरेका थिए । महानगरले राप्रपालाई आइतबारसम्म भवन खाली नगरे सोमबार भत्काउने सूचना दिएको थियो । तर, राप्रपाले महानगरको सूचना बेवास्ता गर्दै भवन खाली गराएको थिएन । 

महानगरले राप्रपाको कार्यालय भवन अनधिकृत भएको भन्दै भत्काउन खोजेको हो । राप्रपाको केन्द्रीय कार्यालय रहेको भवनको कौसीले हाइटेन्सन लाइन छुन्छ । हाइटेन्सन लाइन भएको ३५ फिट दायाँ र बायाँ संरचना बनाउन नमिल्ने र संरचनाको नक्सापाससमेत नहुने प्रावधान छ ।