प्रतिनिधि सभामा ई–हाजिरीको तयारी, सांसदको उपस्थितिलाई वेबसाइटमा राखिने

काठमाण्डौ, बैशाख २४ । प्रतिनिधि सभामा सांसदहरु गयल हुने क्रम बढेपछि डिजिटल उपस्थिति अर्थात् ई–हाजिरीको तयारी सुरु भएको छ । सांसदहरुको ई–हाजिरी सुरु गर्नेबारे कार्य व्यवस्था परामर्श समितिको आजको बैठकमा छलफल भएको हो ।

बैठकमा ई–हाजिरी सुरु गर्ने र सांसदहरुको उपस्थिति वेबसाइटमार्फत् सार्वजनिक गर्नेबारेमा छलफल भएको हो । बैठकमा सभामुख देवराज घिमिरेले संसदमा सांसदहरुको उपस्थिति कमजोर रहेको र सांसदहरु तलब भत्ता खान मात्र बैठकमा आउँछन् भन्ने आम बुझाइ रहेकाले अब ई–हाजिरीको विकल्प नभएको बताउनुभएको छ ।

दल तथा सांसदहरुलाई बैठकमा नियमित र प्रभावकारी उपस्थितिका लागि पनि सभामुखले ध्यानाकर्षण गराउनुभएको छ । यस्तै आज अपराह्न ४ बजेबाट सङ्घीय संसद्का दुवै सदनको बैठक बस्दै छ ।