पाकिस्तानमा बस र ट्रक ठोक्किँदा ११ जनाको मृत्यु, ३३ घाइते

इस्लामावाद । पाकिस्तानको पञ्जाब प्रान्तमा शुक्रबार भएको भीषण सडक दुर्घटनामा परी कम्तीमा ११ जनाको मृत्यु भएको छ भने ३३ जना घाइते भएका छन् । स्थानीय सञ्चारमाध्यमका अनुसार पाकपट्टननजिकै डेपालपुर सडकखण्डमा यात्रुवाहक बस र ट्रक एकआपसमा ठोक्किँदा दुर्घटना भएको हो ।

बस मुल्तानबाट कसुरतर्फ जाँदै थियो भने ट्रक विपरीत दिशाबाट आइरहेको थियो । उद्धार संस्था रेस्क्यु ११२२ का अनुसार दुर्घटनामा आठ जना सामान्य घाइते भएका छन् भने अन्य २५ जनालाई उपचारका लागि पाकपट्टनस्थित अस्पताल लगिएको छ।

दुर्घटनापछि उद्धारकर्मीले करिब तीन घण्टासम्म उद्धार अभियान सञ्चालन गरेका थिए। बस र ट्रकको भग्नावशेषमा फसेका यात्रुलाई निकाल्न क्रेनलगायत भारी उपकरण प्रयोग गरिएको थियो।

पञ्जाबमा एक महिनामै ४४ हजारभन्दा बढी दुर्घटना

पाकिस्तानको पञ्जाब प्रान्तमा सडक दुर्घटनाको अवस्था गम्भीर देखिएको छ। गत अक्टोबरमा मात्रै त्यहाँ ४४ हजार ७९७ वटा सडक दुर्घटना भएका थिए। ती दुर्घटनामा ४६४ जनाको मृत्यु भएको थियो भने २३ हजार ५४३ जना गम्भीर घाइते भएका थिए। तीमध्ये करिब तीनचौथाइ दुर्घटना मोटरसाइकलसँग सम्बन्धित थिए।

सबैभन्दा बढी दुर्घटना लाहोरमा भएका थिए। त्यहाँ मोटरसाइकलसँग सम्बन्धित ७ हजार ८७४ दुर्घटना अभिलेख गरिएको थियो। मुल्तान, फैसलाबाद र गुजराँवालामा पनि हजारौँ दुर्घटना भएका थिए ।

अक्टोबरमा मात्रै विभिन्न प्रकृतिका दुई लाख ३१ हजारभन्दा बढी आपत्कालीन घटनामा उद्धार टोली परिचालित भएका थिए। ती घटनामा सडक दुर्घटना, आगलागी, डुबान तथा स्वास्थ्यसम्बन्धी आपत्कालीन अवस्था समावेश थिए।