डोटीका भूकम्प पीडितलाई एक लाख रुपैयाँ सहयोग गर्ने एमालेको घोषणा

डोटी, कात्तिक २३ । नेकपा एमाले डोटीले भूकम्प पीडितको राहत तथा उद्धारका लागि जिल्ला व्यवस्थापन समितिलाई एक लाख रुपैयाँ सहयोग गर्ने घोषणा गरेको छ । डोटी प्रदेश सभा क्षेत्र “क” का उम्मेदवार समेत रहेका एमाले जिल्ला अध्यक्ष चक्र मल्लले सहयोगको घोषणा गरेका हुन् ।

बुधबार बिहान भूकम्प प्रभावित क्षेत्र पूर्वीचौकी गाउँपालिका–३ ठाँडा गाउँ पुगेर पीडितहरुलाई भेटेका मल्लले भूकम्पबाट पीडितहरुको उद्दार र राहतमा सहयोग पुगोस् भन्ने उद्देश्यले उक्त रकम दिने निर्णय गरेको जानकारी दिए । मल्लले उक्त रकम जिल्ला विपद व्यवस्थापन समितिलाई तत्कालै उपलब्ध गराउने बताए ।

‘अन्त्यन्तै पीडादायी घटना भएको छ, यति बेला सबैले मानवीय संवेदना देखाउनु पर्छ’ अध्यक्ष मल्लले भने, ‘सबैले आ–आफ्नो क्षेत्रबाट सहयोग गर्न म आग्रह गर्दछु ।’ पार्टीले गर्ने सहयोगको विषयमा आफूले आधिकारिक रुपमा डोटीका प्रमुख जिल्ला अधिकारीलाई जानकारी गराइसकेको समेत उनले बताए ।