एमालेको रौतहट जिल्ला कमिटी विघटन प्रभु साह निष्कासित, रेग्मीलाई इन्चार्जको जिम्मेवारी

बुटवल, असोज २८ । नेकपा एमालेले रौतहट जिल्ला कमिटी विघटन गरेको छ । एमालेको मधेश प्रदेश कमिटीका अध्यक्ष रामऔतार यादवले शुक्रबार एक विज्ञप्ति जारी गरी जिल्ला कमिटी अध्यक्ष त्रिभुवन साह लगायतका केही व्यक्तिहरु पार्टी विरोधी गतिविधिमा लागेकाले जिल्ला कमिटी विघटन गरेको बताए ।

एमालेले पार्टी छाडेर स्वतन्त्र उम्मेदवारी दिएका स्थायी समिति सदस्य प्रभु साहमाथि पनि कारवाही गरेको छ । पार्टी महासचिव शंकर पोखरेलले शुक्रबार विज्ञप्ति जारी गर्दै साहलाई पार्टीको साधारण सदस्य समेत नरहने गरि कारवाही गरिएको उल्लेख गरेका छन् । प्रभु साहसँगै जिल्ला इज्चार्ज उपेन्द्र साह र सहइन्चार्ज कुन्दनप्रसाद कुशवानलाई पनि साधारण सदस्यसमेत नरहने गरी कारवाही गरिएको उल्लेख गरिएको छ ।

त्यस्तै एमाले रौतहट जिल्ला इन्चार्जमा उद्धव रेग्मीलाई मनोनयन गरिएको छ । पार्टीका जिल्ला इन्चार्ज उपेन्द्र साह निष्कासनमा परेपछि रेग्मीलाई जिल्ला इन्चार्जको जिम्मेवारी दिईएको हो ।