ग्लोबल मिथेन फोरमको कार्यक्रममा सहभागी हुन वनमन्त्री प्रदीप यादव अमेरिका प्रस्थान

वीरगञ्ज, १० असोज । ग्लोबल मिथेन क्लाईमेट क्लीन एयर फोरमको कार्यक्रममा सहभागी हुन नेपाल सरकारका वन तथा वातावरणमन्त्री प्रदीप यादव अमेरिका प्रस्थान गर्नुभएको छ ।

ग्लोबल मिथेन फोरमको आयोजनामा असोज ११ गतेदेखि १५ सम्म चल्ने कार्यक्रममा सहभागी हुन मन्त्री यादव आइतबार साँझ अमेरिका प्रस्थान गर्नुभएको हो ।

अमेरिकी सरकारको निम्तोमा त्यहाँ जान लाग्नुभएका मन्त्री यादवले नेपालको प्रतिनिधित्व गर्दै मिथेन ग्याँस उत्सर्जन न्यूनिकरण गर्न राष्ट्रहरुले कस्ता प्राविधिक नीति बनाउने र मिथेनको प्रभावलाई न्यूनीकरण गर्दै यस्को प्रयोग कसरी गर्ने लगायतका विषयमा छलफल गर्नु हुनेछ ।

त्यसकासाथै मन्त्री यादव मिथेन र अन्य अल्पकालीन जलवायू प्रदूषकहरूलाई कम गर्नका लागि विश्वव्यापी रुपमा भइरहेका उच्चस्तरीय भइरहेका प्रयास, विकसित मुलुकहरुले यसको न्यूनीकरणका लागि उठाएका कदमका विषयमा पनि छलफल गर्नु हुनेछ ।

कार्यक्रममा यसअघि सोही विषयमा भएका छलफल माथि हालसम्मको प्रगती र विभिन्न राष्ट्रहरुले मिथेन ग्याँस उत्सर्जन न्यूनीकरण गर्न गरिरहेका प्रयासहरुको बारेमा पनि छलफल हुने मन्त्री यादवको सचिवालयले जनाएको छ ।

अमेरिकाको राजधानी वासिङ्गटन डिसी सहरमा हुने उक्त कार्यक्रममा ६० भन्दा बढी देशका प्रतिनिधि सहभागी हुने जनाइएको छ ।