टिकटक बनाउने क्रममा खोलाले बगाएर किशोरी बेपत्ता

रोल्पा, भदौ २८ । रोल्पाको सुलिचौर दोभानस्थित लुङ्ग्री खोलाले बगाएर सोमबार एक किशोरी बेपत्ता भएकी छिन् । सुर्योदय माविमा अध्ययनरत १४ वर्षीय फरीदा खातुनलाई खोलाले बगाएको हो ।

उनी सोमबार दिउँसो करिब साढे ३ बजेको समयमा आफ्ना साथीहरूसँग घुमघाम गर्न खोला किनारामा पुगेकी थिइन् । साथीहरूसँग खेल्दै टिकटक बनाउने क्रममा खातुनलाई खोलाले बगाएको खातुनका साथीहरूले बताएका छन् ।

हिजो राति स्थानीय र प्रहरीले अबेरसम्म खोजीकार्य गर्दा पनि उनलाइ फेला पार्न नसकिएको जिल्ला प्रहरी कार्यालय रोल्पाका प्रवक्ता एवम् सूचना अधिकारी प्रकाश भुसालले जानकारी दिए । आज बिहानैदेखि प्रहरी निरीक्षक प्रकाश वाग्लेको कमाण्डमा स्थानीय र प्रहरी मिलेर खोजीकार्य गरिरहेको प्रहरीले जनाएको छ ।