कांग्रेसका आगामी कार्यक्रम आसन्न स्थानीय तह र प्रदेश सभा निर्वाचन केन्द्रित हुने

काठमाडौँ । नेपाली कांग्रेसको १५औँ महाधिवेशनबाट निर्वाचित केन्द्रीय कार्यसमितिको पहिलो बैठक बिहीबार पार्टी केन्द्रीय कार्यालय सानेपामा बस्यो ।

पार्टीका पदाधिकारी तथा केन्द्रीय सदस्यहरूलाई निर्वाचन समितिको रोहवरमा पद तथा गोपनीयताको शपथ गराएपछि बसेको बैठकमा नवनिर्वाचित सभापति गगन थापाले सदस्य र पदाधिकारीहरूलाई केही निर्देशन दिए ।

‘अबको चार महिना तपाईंहरू तोकेको क्षेत्रमा जानुपर्छ । त्यहाँ घुम्न होइन, पार्टीले टास्क दिन्छ, त्यो पूरा गरेर रिपोर्ट दिनुपर्छ,’ सभापति थापाले सदस्यहरूलाई दिएको निर्देशन उद्धृत गर्दै केन्द्रीय सदस्य अंशुल केसीले भने ।

सभापति थापाले बिहीबारको बैठकमा मात्रै होइन, कात्तिक १० गते पोखराको कार्यक्रममा पनि केन्द्रीय सदस्यहरूलाई काठमाडौँ केन्द्रित भएर बस्न नदिने बताएका थिए । उनले जिम्मेवारीसहित नेताहरूलाई गाउँ–गाउँमा पठाइने र मंसिर महिनाभर अभियान सञ्चालन गरिने बताए ।

गत फागुनको निर्वाचनमा अर्कै पार्टीलाई मतदान गरेका कांग्रेस समर्थकहरूलाई पुनः पार्टीमा जोड्न संवाद आवश्यक रहेको र त्यसका लागि मंसिर महिनाभर अभियान सञ्चालन गर्ने उनको भनाइ थियो ।

‘एक जना पनि केन्द्रीय सदस्यलाई काठमाडौँ बस्ने अवस्था आउन दिन्नँ । सबैलाई तल पठाउने हो, गाउँ–गाउँमा । अब चुनावको उम्मेदवार माथिबाट छान्दैन । जुन तहको निर्वाचन हो, त्यही तहका साथीहरूले उम्मेदवार तय गर्ने हो,’ कार्यक्रममा सभापति थापाले भनेका थिए, ‘यो कुरा विधानमै व्यवस्था गरिएको छ । उम्मेदवार हुन चाहने र पार्टीका नेताहरू केन्द्रतिर बसिराख्ने होइन, तलतल जाने हो ।

बिहीबारको बैठकमा थापाले पदाधिकारीलाई पनि टास्क दिएर जिल्ला–जिल्लामा खटाउने रणनीति बनाएका छन् ।

सहमहामन्त्री प्रकाश रसाइली ‘स्नेही’ले पार्टीको पुरानो मत फर्काउने आफूहरूको पहिलो योजना रहेको बताए । ‘हाम्रो गुमेको मत फर्काउने पहिलो काम छ,’ सहमहामन्त्री रसाइलीले रातोपाटीसँग भने, ‘केन्द्रीय सदस्यलाई चार महिना फिल्डमा खटाउने सभापतिले बताइसक्नु भएको छ । कांग्रेसले गुमेको १० लाख मत फर्काउन पदाधिकारी र केन्द्रीय सदस्यलाई जिल्ला–जिल्लामा पठाउने योजना बनाएको छ ।’

पदाधिकारी र सदस्यहरूलाई पहिलो केन्द्रीय समिति बैठकमा कुन विषयमा र कुन क्षेत्रमा काम गर्ने हो कार्ययोजनासहितको फारम भरेर पार्टी केन्द्रीय कार्यालयमा बुझाउन सभापति थापाले निर्देशन दिएका छन् । फारममा भूगोलमा गएर काम गर्न चाहनेलाई जिल्ला, गाउँ/नगरपालिका कुन हो, त्यो उल्लेख गरेर फारम भर्न भनिएको सहमहामन्त्री रसाइलीले बताए ।

त्यो बाहेक केन्द्रमा निर्वाचन व्यूरो, भ्रातृसंस्था, शुभेच्छुक संस्थामा काम गर्न चाहनेलाई पनि खुलाउन भनिएको छ । कांग्रेसले महाधिवेशनभन्दा अगाडि उपसभापति पुष्पा भुसालको संयोजकत्वमा निर्वाचन व्यूरो बनाएर आगामी निर्वाचनमा कस्ता कस्तालाई उम्मेदवार बनाउने ? पार्टीको जनमत कहाँ कस्तो छ भन्नेबारे अनुसन्धान सुरु गरेको थियो । त्यसलाई अब पनि निरन्तरता दिने रणनीति छ ।

‘केन्द्रबाट स्थानीय तह र प्रदेशमा उम्मेदवार चयन हुँदैनन् । निर्वाचन व्यूरोले अध्ययन अनुसन्धान गर्छ । आन्तरिक सर्वेक्षण गर्छ । त्यो उम्मेदवारको आकांक्षीलाई थाहा हुँदैन,’ सहमहामन्त्री रसाइलीले भने, ‘त्यसपछि रिपोर्टमा कसको पक्षमा बलियो जनमत छ, त्यसलाई पार्टीले उम्मेदवार बनाउँछ । पार्टीको पदमा रहेकाका पक्षमा जनमत नभए क्रियाशील सदस्यमात्रै भएकाले पनि टिकट पाउन सक्छन् ।’
कार्यसमितिलाई पूर्णता दिएपछि भ्रातृ र शुभेच्छुक संस्थाका अधिवेशन

सभापति थापाको योजना कार्यसमितिलाई पूर्णता दिने पनि प्राथमिकतामा छ । कांग्रेसको संशोधित विधानमा सभापतिले ६६ केन्द्रीय सदस्य मनोनीत गर्न सक्छन् । त्यो बाहेक केन्द्रीय सदस्यमध्येबाट ४ सहमहामन्त्री, एक कोषाध्यक्ष, एक प्रवक्ता र एक सहप्रवक्ता मनोनीत गर्न सक्छन् । विधानमा दुई महिनाभित्र मनोनीत गर्ने उल्लेख भए पनि सकभर चाँडै मनोनीत गरेर जिम्मेवारीमा खटाउने योजना सभापति थापाको छ ।

सहमहामन्त्री रसाइलीले पहिला कार्यसमितिलाई पूर्णता दिइने र कार्यसमितिले पूर्णता पाएपछि नेतृत्वविहीन भ्रातृसंस्थाका अधिवेशन गर्नतर्फ पार्टी लाग्ने उनको भनाइ छ ।
पार्टीका कार्यक्रम निर्वाचन र समुदाय केन्द्रित हुने
कांग्रेसका आगामी कार्यक्रम आसन्न स्थानीय तह र प्रदेश सभा निर्वाचन केन्द्रित हुने छन् । स्थानीय तहका अहिलेका पदाधिकारीको कार्यकाल वैशाखसम्म छ । प्रदेश सभाका सदस्यहरूको म्याद २०८४ को मंसिरसम्म छ । त्यसैले स्थानीय तह निर्वाचनका लागि ६ महिना र प्रदेश सभा निर्वाचनका लागि १ वर्ष मात्रै बाँकी रहेकाले पार्टीका कार्यक्रम निर्वाचन केन्द्रित बनाइने सहमहामन्त्री रसाइलीले बताए ।

त्यो बाहेक पार्टीका अन्य कार्यक्रम समुदाय केन्द्रित बनाउने गरी योजना बनिरहेको उनको भनाइ छ ।