विजयादशमी मानवीय मूल्य र सदाचारको विजयको उत्सव: उपराष्ट्रपति यादव

काठमाडौँ । उपराष्ट्रपति रामसहाय प्रसाद यादवले हिन्दू धर्मावलम्बीको महान् पर्व विजयादशमी धार्मिक आस्थाको विषय मात्र नभएर मानवीय मूल्य, नैतिकता र सदाचारको विजयको उत्सव भएको बताएका छन्।

विजयादशमी, २०८३ का अवसरमा शुभकामना सन्देश जारी गर्दै उनले सत्य, न्याय, धर्म र सदाचारको जित सुनिश्चित हुने युगीन सन्देश बोकेको बडादसैँले मानिसलाई आफ्नो आचरण र व्यवहारको आत्मसमीक्षा गर्ने अवसर दिने उल्लेख गरे।

उपराष्ट्रपति यादवले असत्य, अन्याय, विभेद, हिंसा र नकारात्मक प्रवृत्तिमाथि मानवता, विवेक र नैतिक शक्तिको विजय सुनिश्चित हुने विश्वासलाई यस पर्वले बलियो बनाउने बताए। उनका अनुसार विजयादशमीले समाजमा सहिष्णुता, आत्मानुशासन, संयम र कर्तव्यप्रतिको निष्ठा बढाउँछ।

साथै, लोभ, घृणा, अहङ्कार, ईष्र्या र वैमनस्यजस्ता दुर्गुण त्यागेर सहकार्य, समर्पण, सद्भाव र मानवीय संवेदनाको बाटोमा लाग्न दसैँले प्रेरणा दिने उनको भनाइ छ। व्यक्तिको आन्तरिक शुद्धीकरण र सामाजिक उत्तरदायित्वबीच सन्तुलन कायम राख्न पनि यस पर्वको विशेष भूमिका रहन्छ।

दसैँलाई पुनर्मिलन र आत्मीयताको महापर्वका रूपमा व्याख्या गर्दै उनले शिक्षा, रोजगारी वा व्यवसायका कारण टाढा रहेका व्यक्तिहरू यस अवसरमा प्रियजनसँग भेटघाट गरी सम्बन्ध नवीकरण गर्ने परम्परा रहेको बताए।

ज्येष्ठको आशीर्वाद, अग्रजप्रतिको सम्मान र कनिष्ठप्रतिको स्नेह आदानप्रदानले पारिवारिक तथा सामाजिक सम्बन्ध बलियो बनाउने भएकाले विजयादशमी धार्मिक संस्कारमा मात्र सीमित नभई सामाजिक एकता र मानवीय सम्बन्धको उत्सवका रूपमा स्थापित भएको उनले स्पष्ट पारे।

परम्परागत संस्कार, लोककला, सङ्गीत र सांस्कृतिक अभ्यासले राष्ट्रिय पहिचानलाई समृद्ध बनाउने भन्दै उनले यस्ता आयामको संरक्षणमा दसैँको योगदान महत्वपूर्ण रहेको बताए। आजको परिवर्तित विश्व परिवेशमा सामाजिक सद्भाव, राष्ट्रिय एकता र सहअस्तित्व झनै आवश्यक भएको उल्लेख गर्दै उनले विभाजनभन्दा माथि उठेर साझा राष्ट्रिय हित र समुन्नत नेपाल निर्माणमा लाग्न दसैँले प्रेरणा देओस् भन्ने कामना गरे।