कपिलवस्तको शिवपुरबाट ५२ लाखभन्दा बढी मूल्यको अबैध रेडिमेड सर्ट बरामद

कपिलवस्तु । नेपाल भारत सीमाक्षेत्र पर्ने कपिलवस्तुको शिवराज नगरपालिका–१ शिवपुर कोलनी चोकबाट भन्सार छली चोरी निकासी गरी ल्याएको अबैध सामान बरामद गरिएको छ ।

सो अबैध सामान इलाका प्रहरी कार्यालय सुन्दरीडाँडाबाट खटिएको ७ जनाको प्रहरी टोलीले सोमबार पूर्व–पश्चिम राजमार्गमा चेकजाँच गर्ने क्रममा काठमाडौंबाट दाङतर्फ जाँदै गरेको बा.प्र.०१००७ ख ०४३० नम्बरको कन्टेनरबाट ७ हजार १५२ पिस रेडिमेड सर्ट बरामद गरेका हुन ।

कन्टेनरमा उक्त सामानक्ल बिलमा बिजक नम्बर उल्लेख नभएको ठूलो परिमाणको रेडिमेड सर्ट बरामद गरेको हो । प्रहरीका अनुसार बरामद रेडिमेड सर्टको भ्याटसहित अनुमानित मूल्य रु. ५२ लाख ५३ हजार १४४ रहेको छ।

यस्तै, कन्टेनरको अनुमानित मूल्य रु. ३० लाख रहेको प्रहरीले जनाएको छ । बरामद सामान र कन्टेनरसहित कुल रु. ८२ लाख ५३ हजार १४४ बराबरको मूल्यांकन गरिएको प्रहरीले जनाएको छ।

बरामद सामग्री र कन्टेनरलाई नियन्त्रणमा लिई आवश्यक कानुनी कारबाहीका लागि इलाका प्रहरी कार्यालय सुन्दरीडाँडामा राखिएको छ । घटनाबारे थप अनुसन्धान भइरहेको प्रहरीले जनाएको छ ।