यूएईमा आदिवासी जनजाति महासंघको प्रशिक्षण कार्यक्रम हुँदै, नेतृत्व विकासदेखि स्वास्थ्य र रोजगारीसम्मका विषय समेटिने

दुबई, यूएई |

नेपाल आदिवासी जनजाति महासंघ, यूएईको आयोजनामा नेतृत्व क्षमता विकास, स्वास्थ्य सचेतना तथा रोजगारीसम्बन्धी सीप अभिवृद्धि गर्ने उद्देश्यले आगामी अक्टोबर ११ मा प्रशिक्षण कार्यक्रम आयोजना हुने भएको छ।

‘प्राप्त अधिकारको रक्षा आजको आवश्यकता, पहिचानसहितको समावेशी र न्यायपूर्ण नेपाल निर्माणमा हाम्रो साझा प्रतिबद्धता’ भन्ने मूल नाराका साथ महासंघले प्रशिक्षण कार्यक्रम आयोजना गर्न लागेको हो। साथै, ‘Honouring Indigenous Midwives: Safeguarding Life and Well-being’ अर्थात् ‘आदिवासी धामी तथा परम्परागत सुँडेनीहरूको सम्मान : जीवन र स्वास्थ्य सुरक्षाको सुनिश्चितता’ भन्ने नारालाई समेत कार्यक्रममा समेटिएको छ।

नेपाल आदिवासी जनजाति महासंघ, यूएई (Nepal Federation of Indigenous Nationalities, UAE) को आयोजनामा हुन लागेको उक्त प्रशिक्षण कार्यक्रम आगामी ११ अक्टोबर २०२६, आइतबारका दिन दिउँसो १२:३० बजेदेखि सञ्चालन हुनेछ। कार्यक्रम बरदुबईस्थित हाम्रो माइतीघर रेस्टुरेन्ट, पुल स्टार क्याफेमा आयोजना गरिने आयोजकले जनाएको छ।

प्रशिक्षण कार्यक्रममा संस्थागत नेतृत्व विकास, बैठक व्यवस्थापन, स्वास्थ्य सचेतना तथा रोजगारीका अवसरसँग सम्बन्धित व्यावहारिक विषयहरूलाई प्राथमिकताका साथ समेटिएको छ। कार्यक्रमअन्तर्गत मुख्यतः तीनवटा विषयमा प्रशिक्षण प्रदान गरिनेछ।

पहिलो सत्रमा माइन्युट लेखन, बैठक सञ्चालन, उद्घोषण तथा मन्तव्य प्रस्तुति सम्बन्धी प्रशिक्षण दिइनेछ। यस सत्रमा संस्थागत गतिविधिलाई प्रभावकारी बनाउन आवश्यक बैठक व्यवस्थापन, निर्णय अभिलेखीकरण, औपचारिक कार्यक्रम सञ्चालन तथा सार्वजनिक रूपमा आफ्ना विचार र मन्तव्य प्रस्तुत गर्ने सीपबारे जानकारी प्रदान गरिनेछ। विशेषगरी विभिन्न जातीय तथा सामाजिक संस्थामा आबद्ध पदाधिकारी र सदस्यहरूको नेतृत्व तथा सञ्चार क्षमता अभिवृद्धि गर्ने उद्देश्य यस सत्रले राखेको छ।

त्यसैगरी, दोस्रो सत्रमा स्वास्थ्य तथा प्राथमिक उपचार सम्बन्धी प्रशिक्षण सञ्चालन हुनेछ। दैनिक जीवनमा आइपर्न सक्ने स्वास्थ्यसम्बन्धी समस्याहरू, आकस्मिक दुर्घटना तथा आपत्कालीन परिस्थितिमा अपनाउनुपर्ने सावधानी र प्राथमिक उपचारका आधारभूत विधिबारे सहभागीलाई जानकारी दिइनेछ। प्रवासमा रहेका नेपाली समुदायमा स्वास्थ्य सचेतना अभिवृद्धि गर्नुका साथै आवश्यक परेको समयमा प्रारम्भिक सहायता प्रदान गर्न सक्ने क्षमता विकासमा यस सत्रले सहयोग पुर्‍याउने अपेक्षा गरिएको छ।

तेस्रो सत्रमा रोजगारी तथा अन्तर्वार्ता तयारी सम्बन्धी प्रशिक्षण प्रदान गरिनेछ। यूएईमा रोजगारीका अवसर खोजिरहेका तथा आफ्नो व्यावसायिक क्षमता विकास गर्न चाहने व्यक्तिलाई लक्षित गरी अन्तर्वार्तामा प्रस्तुत हुने तरिका, आत्मविश्वास अभिवृद्धि, रोजगारदातासँगको प्रभावकारी संवाद तथा रोजगारी प्राप्तिका लागि आवश्यक तयारीका विषयमा प्रशिक्षण दिइनेछ।

यूएईमा विभिन्न पेसा, व्यवसाय तथा सामाजिक क्षेत्रमा सक्रिय आदिवासी जनजाति समुदायका सदस्यहरूको व्यक्तिगत क्षमता, संस्थागत दक्षता र व्यावसायिक सीप विकासमा योगदान पुर्‍याउने उद्देश्यले कार्यक्रम आयोजना गर्न लागिएको हो। महासंघमा आबद्ध विभिन्न जातीय तथा सामाजिक संस्थाका पदाधिकारी, प्रतिनिधि तथा सदस्यहरूको सहभागितालाई लक्षित गरिएको यस कार्यक्रमले संस्थागत एकता, नेतृत्व विकास र आपसी सहकार्यलाई थप मजबुत बनाउने अपेक्षा गरिएको छ।

प्रवासमा रहेर पनि आफ्नो मौलिक पहिचान, भाषा, संस्कृति, परम्परा तथा सामुदायिक अधिकारको संरक्षण र प्रवर्द्धनमा सक्रिय आदिवासी जनजाति समुदायलाई ज्ञान, सीप र व्यवहारिक अनुभवसँग जोड्नु कार्यक्रमको महत्वपूर्ण पक्षका रूपमा रहेको छ। साथै, स्वास्थ्य सुरक्षा र रोजगारीसम्बन्धी व्यावहारिक ज्ञानले यूएईमा कार्यरत नेपाली श्रमिक तथा समुदायका सदस्यहरूलाई लाभ पुग्ने विश्वास गरिएको छ।

महासंघले आफ्ना मातहत तथा आबद्ध संस्थाहरूबीच समन्वय, सहकार्य र क्षमता अभिवृद्धिलाई प्राथमिकता दिँदै यस्ता प्रशिक्षणमूलक कार्यक्रममार्फत समुदायका सदस्यहरूलाई थप दक्ष, सचेत र सक्षम बनाउने लक्ष्य राखेको छ।

कार्यक्रम विवरण

आयोजक: नेपाल आदिवासी जनजाति महासंघ, यूएई

• मिति: ११ अक्टोबर २०२६, आइतबार
• समय: दिउँसो १२:३० बजेदेखि
• स्थान: हाम्रो माइतीघर रेस्टुरेन्ट, पुल स्टार क्याफे, बर दुबई

प्रशिक्षणका विषय: माईन्युट लेखन, बैठक सञ्चालन, उद्घोषण तथा मन्तव्य प्रस्तुति, स्वास्थ्य तथा प्राथमिक उपचार, रोजगारी तथा अन्तर्वार्ता तयारी।

यस प्रशिक्षण कार्यक्रमले यूएईमा रहेका आदिवासी जनजाति समुदायका सदस्यहरूको नेतृत्व क्षमता, स्वास्थ्य सचेतना र रोजगारीसम्बन्धी सीप अभिवृद्धिमा महत्वपूर्ण योगदान पुर्‍याउने अपेक्षा गरिएको छ।