सिक्टा सिँचाइ आयोजनाको भौतिक प्रगति ५१ प्रतिशत: किसानको गुनासो सुन्दै आयोजना प्रमुख

बाँके। बाँकेमा निर्माणाधीन राष्ट्रिय गौरवको आयोजना सिक्टा सिँचाइले बाँकी निर्माण कार्यलाई प्रभावकारी बनाउन स्थानीय किसानसँग सुझाव सङ्कलन गरेको छ।

आयोजनाले पूर्वी नहर प्रणालीअन्तर्गत पर्ने राजकुलो शाखा, उपशाखा तथा प्रशाखा नहरबाट सिँचाइ सुविधा लिइरहेका र भविष्यमा लिने सोच बनाएका किसान तथा सरोकारवालालाई लक्षित गरी मङ्गलवार राप्ती सोनारी गाउँपालिका-३ बैजापुरमा गुनासो सुनुवाइ कार्यक्रम आयोजना गरेको हो।

‘आयोजना किसानका लागि हो,’ आयोजना निर्देशक आचार्य भन्छन्, ‘भइरहेको कामप्रति किसानको राय बुझ्न गुनासो सुनुवाइ कार्यक्रम गरिरहेका छौँ।’ उनका अनुसार यसअघि सिक्टा सिँचाइ आयोजनाको पश्चिम मूल नहरअन्तर्गतका चार शाखा नहरमा गुनासो सुनुवाइ तथा सुझाव सङ्कलन भइसकेको छ। अब पूर्वी नहरका बाँकी शाखाअन्तर्गतका किसानमाझ पनि गुनासो सुनुवाइ गरिनेछ। दुई-तीन वर्षभित्रै शाखा तथा उपशाखा नहर निर्माणको काम सम्पन्न गर्ने गरी आयोजनाले किसानको राय-सुझाव सङ्कलन गरिरहेको उनले बताए।

बैजापुरमा आयोजित कार्यक्रममा किसानले बिना अवरोध आफूहरूले सिँचाइ पानी पाउनुपर्ने माग राखेका छन्। स्थानीयवासीसमेत रहेका संविधानसभा सदस्य पट्टु थारूले सरोकारवाला किसानसँग छलफल गरेर आयोजनाले काम अगाडि बढाउनु सकारात्मक भएको बताएका छन्। राप्ती सोनारी गाउँपालिका-३ का वडाध्यक्ष मीनकुमार चौधरी र सिँचाइ महासङ्घ बाँकेका पूर्वअध्यक्ष शालिकराम डाँगीले किसानले सहज रूपमा सिँचाइ सुविधा पाउनुपर्नेमा जोड दिएका छन्।

आयोजना निर्देशक आचार्यका अनुसार हालसम्म आयोजनाको ५१ प्रतिशत भौतिक प्रगति भएको छ। पूर्वाधार निर्माणतर्फ २४ अर्ब रुपैयाँ खर्च भइसकेको उनले जानकारी दिएका छन्।

आर्थिक वर्ष २०६२/६३ मा सुरु भएको यो आयोजनाअन्तर्गत बाँकेको राप्ती सोनारी गाउँपालिका अगैयास्थित राप्ती नदीमा ३१७ मिटर लामो ब्यारेज निर्माण गरी ४२ हजार ७६६ हेक्टर भूमिमा सिँचाइ सुविधा पुर्याउने लक्ष्य राखिएको छ। नेपाल सरकारको आफ्नै स्रोतबाट निर्माण सुरु गरिएको यो आयोजनाको पश्चिम मूल नहरबाट ३३ हजार ७६६ हेक्टर र पूर्वी मूल नहरबाट करिब नौ हजार हेक्टरमा सिँचाइ सुविधा पुर्याउने लक्ष्य छ। हाल २५ हजार हेक्टर जमिनमा सिँचाइ सुविधा पुगिसकेको आयोजना निर्देशक आचार्यले बताए।