सामाजिक सञ्जालमा हृदयविदारक तस्बीर, भिडियो पोस्ट नगर्न सञ्चार मन्त्रालयको अनुरोध

काठमाडौँ । बुधबार आएको बाढी पहिरो र त्यसले सिर्जना गरेको विपद्का सन्दर्भमा मानीवय संवेदनालाई ध्यानमा राखेर मात्रै विपद्सँग सम्बन्धि  समाचार, सूचना तथा विवरण सम्प्रेषण गर्न सरकारले अनुरोध गरेको छ ।

सूचना तथा सञ्चार मन्त्रालयबाट जारी गरिएको विज्ञप्तीमा यस्तो समयमा प्रवाह हुने सूचनाले उद्दार, राहत तथा जनमानसमा पार्ने प्रभाव अति नै महत्वपूर्ण हुने उल्लेख छ । मन्त्रालयले सामाजिक सञ्जालमा हृदयविदारक घटनाका तस्बीर, भिडियो वा विवरण पोस्ट तथा रिपोस्ट नगर्न अनुरोध गरेको छ ।

पिडित र उनीहरूका परिवारप्रति पूर्ण मानवीय संवेदनशीलता दर्शाउन भनिएको छ । भयावह र समाजलाई विचलित बनाउने सामग्री सेयर नगर्न मन्त्रालयले स्पष्ट पारेको हो । यस्तै, मन्त्रालयले विपद्‌बाट प्रभावित र पिडितको उद्धार तथा राहत वितरणको प्रयास भइरहेको जनाएको छ ।

विपद्का समाचार सम्प्रेषण गर्दा अनिवार्य रूपमा आधिकारिक निकायको सूचनालाई मात्र आधार बनाउन भनिएको छ । गृह मन्त्रालय, जिल्ला प्रशासन कार्यालय, सुरक्षा निकाय र स्थानीय विपद् व्यवस्थापन समितिबाट प्राप्त सूचना मात्रै पत्याउन आग्रह गरिएको छ ।  मन्त्रालयले भ्रामक सूचना प्रवाहमा नियन्त्रण गर्न आग्रह गरेको छ। ‘अपुष्ट, कपोलकल्पित, कृत्रिम बुद्धिमताको प्रयोगबाट सिर्जित भ्रामक र सर्वसाधारणमा त्रास फैलाउने खालका समाचार तथा अफवाहहरू सम्प्रेषण नगर्न/नगराउनुहुन अपिल गर्छौँ,’ विज्ञप्तीमा भनिएको छ ।