सुस्ता क्षेत्रमा तटीय क्षेत्रमा जोखिम, सुस्तामा कटान नियन्त्रणका लागि सारथी बन्दै: आयोजना प्रमुख

 नवलपरासी, साउन ३१। पश्चिम नवलपरासीको सुस्ता क्षेत्रमा नारायणी नदीले तटबन्धको माथिल्लो भाग तीव्र रूपमा कटान गरेपछि तटीय क्षेत्रमा जोखिम बढेको छ । नदी नियन्त्रण तथा रोकथामका लागि नारायणी नदी व्यवस्थापन आयोजनाका प्रमुख डा. नारायण प्रसाद सुवेदी सुस्तावासी र प्राविधिक टोलीसँगै नियन्त्रण कार्यमा अग्रसर देखिनुभएको छ।

विगत एक सातादेखि कार्यस्थल (साइट) मै रहेर डा. सुवेदीले तटबन्धको कार्यको प्रत्यक्ष नेतृत्व गरिरहनुभएको छ । प्राविधिक काम मात्र नभई, कामलाई तीव्र बनाउन आफैँ बालुवाका बोरा भर्ने, पर्कुपाइन सेट गर्ने र पर्खाल निर्माणमा हातेमालो गर्दै उहाँ  जुट्नुभएको हो ।

सुस्ता बचाउ अभियानका प्रवक्ता रवीन्द्र जयसवालका अनुसार, आयोजना प्रमुख आफैँ खटिएर श्रमदानसरह काम गर्दा स्थानीय र कामदारहरूमा थप उत्साह र भरोसा पैदा भएको छ। “नदी कटानको यो संकटपूर्ण समयमा आयोजना प्रमुख आफैँ फिल्डमा खटिएर श्रमदानको भावनाका साथ काम गरिरहनुभएको छ। राष्ट्रिय सेवक कर्मचारी यसरी आफैँ मैदानमा उत्रिएर काम गर्दा स्थानीय समुदायमा ठूलो राहत र हौसला मिलेको छ।”

लगातारको  शारीरिक श्रमका कारण आयोजना प्रमुख सुवेदीको ढाडमा समस्या (ढाड सड्किएर बिरामी) आए तापनि नदी कटानको गम्भीरतालाई ध्यानमा राख्दै उहाँले कार्यस्थल छाड्नुभएको छैन। हाल सयौँको संख्यामा स्थानीयवासी, प्राविधिक र कामदारहरू कटान नियन्त्रणमा जुटिरहेका छन्।

आफ्नो उपस्थिति र सक्रियताबारे आयोजना प्रमुख डा. सुवेदीले नागरिक सुरक्षा नै प्राथमिक जिम्मेवारी भएको बताउनुभयो।“यो विपद्को समय हो। प्राविधिक टोली र स्थानीय समुदायसँग मिलेर काम गर्दा मात्रै संकट टार्न सकिन्छ। मेरो उपस्थिति कुनै देखावटी होइन, दायित्व पूरा गर्ने प्रयास मात्र हो।

संकटको घडीमा कार्यस्थलमा खटिने कर्मचारी र प्राविधिक टोलीको यस्तो तदारुकतालाई माथिल्लो निकायले पनि उचित समयमा सम्बोधन गर्न आवश्यक छ। स्थानीय तह र आयोजनाको स्रोत-साधनले भ्याएसम्म बचाउ कार्य तीव्र बनाइए पनि माथिल्लो निकाय र मन्त्रालयको तर्फबाट तुरुन्तै प्रशासनिक तथा प्राविधिक सहयोग पुर्‍याउनुपर्ने देखिन्छ ।