टेम्केमैयुङमा कृषि उपज केन्द्र निर्माण गरिने

भोजपुर । यहाँको टेम्केमैयुङ गाउँपालिका–९ पाँचधारेमा आधुनिक कृषि उपज सङ्कलन तथा बिक्री केन्द्र निर्माण गरिने भएकाे छ । यसका लागि गाउँपालिका र नेपालस्थित भारतीय दूतावासबिच समझदारीपत्रमा मंगलबार हस्ताक्षर भएको छ । गाउँपालिकाका अध्यक्ष सरोज बस्नेत र भारतीय दूतावासका विकास साझेदारी काउन्सिलर अविनाशकुमार सिंहले समझदारीपत्रमा हस्ताक्षर गरेका हुन् ।

उक्त केन्द्रको कुल लागत रु नौ करोड ८८ लाख ६७ हजार ७८५ छ । परियोजनाका लागि कुल लागतको ९५ प्रतिशत रकम भारतीय दूतावासमार्फत उपलब्ध हुने र बाँकी पाँच प्रतिशत रकम तथा मूल्य अभिवृद्धि कर (भ्याट) गाउँपालिकाले व्यहोर्ने सम्झौतामा उल्लेख छ । समझदारीपत्रअनुसार केन्द्र निर्माणको अवधि १५ महिना तोकिएको गाउँपालिका अध्यक्ष बस्नेतले जानकारी दिए ।

गाउँपालिका अध्यक्ष बस्नेतले लामो समयदेखिको पहल, निरन्तर समन्वय र प्रयासपछि कृषि उपज सङ्कलन तथा बिक्री केन्द्र निर्माणको योजना कार्यान्वयनको चरणमा पुगेको बताए । उनले केन्द्रलाई गाउँपालिकाको गौरवको योजनाका रूपमा अघि बढाइएको उल्लेख गर्दै यसबाट स्थानीय किसानले उत्पादनको उचित बजार पाउने विश्वास व्यक्त गरे ।

“कृषि उपज सङ्कलन तथा बिक्री केन्द्र निर्माणका लागि भारतीय दूतावाससँग समझदारीपत्रमा हस्ताक्षर गरेका छौँ”, उनले भने, “यो हाम्रो गाउँपालिकाको गौरवको योजना पनि हो ।” कृषि उपजको उत्पादन बढ्दै जाँदा व्यवस्थित सङ्कलन, भण्डारण र बजार व्यवस्थापनको पर्याप्त सुविधा नहुँदा किसानले समस्या भोग्दै आएका छन् ।