रक्षामन्त्री फेदोरोभको पुनर्वहालीको माग : किभमा हजारौँ युक्रेनीद्वारा प्रदर्शन
किभ । युक्रेनका राष्ट्रपति भोलोडिमिर जेलेन्स्कीले रक्षामन्त्री माइखाइलो फेदोरोभलाई पदबाट हटाउने निर्णयको विरोधमा हजारौँ नागरिकले राजधानी किभमा प्रदर्शन गरेका छन्।
रुससँगको युद्धका क्रममा सैन्य प्रविधिको आधुनिकीकरणमा महत्त्वपूर्ण योगदान दिएका फेदोरोभलाई हटाउने निर्णयप्रति जनताको तीव्र असन्तोष कायमै रहेको छ।
फेदोरोभले सरकारको अन्य कुनै पनि पद स्वीकार गर्न अस्वीकार गरेका छन्। आईटी क्षेत्रमा काम गर्ने ४० वर्षीय ओलेक्सान्डरले भने, ‘मलाई निर्णयहरू कसरी लिइन्छ र त्यसको स्पष्टीकरण कसैले दिन सक्दैन भने त्यो मन पर्दैन।’
सुरुमा जेलेन्स्कीले तत्कालीन सेनापति ओलेक्सान्डर सिरस्कीसँगको गम्भीर विवादका कारण फेदोरोभलाई हटाएको बताएका थिए। तर, उक्त सङ्कटपछि जनदबाबका कारण राष्ट्रपतिले त्यसको एक सातापछि सेनापति सिरस्कीलाई पनि पदबाट हटाएका थिए।
यद्यपि, रक्षा क्षेत्रमा व्याप्त भ्रष्टाचार नियन्त्रणको प्रयास गरेकै कारण फेदोरोभलाई हटाइएको शंका बढेको छ। फेदोरोभ आफैँले पनि एक अन्तर्वार्तामा यो दाबीलाई बल पुग्ने संकेत गरेका थिए।
शुक्रबार प्रदर्शनकारीहरूले राष्ट्रपतिको ध्यानाकर्षण गराउन किभको ऐतिहासिक क्षेत्र हुँदै मुख्य सडक ख्रेसच्यातिकसम्म र्याली निकालेका थिए। प्रदर्शनकारीहरूले सोभियतकालीन सैन्य प्रणालीको प्राविधिक आधुनिकीकरण बिना रुसविरुद्धको युद्ध जित्न नसकिने भन्दै चिन्ता व्यक्त गरे। फेदोरोभलाई हटाउने निर्णय यस्तो समयमा आएको छ, जब युक्रेनले रुसी सैन्य तथा ऊर्जा केन्द्रहरूमा आक्रमण तीव्र बनाएको छ।
जेलेन्स्कीले भने आफ्नो निर्णय फिर्ता लिने कुनै संकेत देखाएका छैनन्। उनले राज्य सुरक्षा सेवाका कार्यवाहक प्रमुख येभहेनी ख्मारालाई कार्यवाहक रक्षामन्त्रीका रूपमा चयन गरेका छन्। युक्रेनको कानुन अनुसार रक्षामन्त्रीको पद गैर-सैन्य व्यक्ति हुनुपर्छ।
युरोपियन पोलिसी इन्स्टिच्युटका निर्देशक म्याटियो मेकाचीका अनुसार माइखाइलो द्रपातीलाई नयाँ सेनापति नियुक्त गर्नाले केही नागरिकमा विश्वास जगाउन सक्छ। तर, जेलेन्स्कीका लागि फेदोरोभको पुनर्वहाली सम्भव नदेखिएकाले अब प्रभावकारी सङ्कट व्यवस्थापनमा ध्यान दिनुपर्ने उनले बताए।
पूर्वसैन्य अधिकृत तथा प्रदर्शनका आयोजक द्मात्रो कोजियातिन्स्कीले जेलेन्स्कीले फेदोरोभलाई रक्षा क्षेत्रमा सुधार ल्याउन एक वर्षको समय दिनुपर्ने र नतिजाका आधारमा मूल्याङ्कन गर्नुपर्ने बताए।
प्रदर्शनमा सहभागी ३८ वर्षीया व्यवसायी इरिनाले सरकारले माग पूरा नगरेसम्म प्रदर्शन जारी राख्ने बताइन्। उनले भनिन्, ‘हामीलाई कुनै हतार छैन। हामी यहाँ बसिरहनेछौँ। हामीसँग अर्को कुनै विकल्प छैन।’
