फ्रान्समा भीषण डढेलो, पर्यटकीय सहरबाट २० हजारभन्दा बढी मानिसको उद्धार

पेरिस। फ्रान्सको दक्षिणपश्चिम क्षेत्रमा फैलिएको भीषण डढेलोका कारण २० हजारभन्दा बढी स्थानीय बासिन्दा र पर्यटकलाई सुरक्षित स्थानमा सारिएको छ। बोर्डो सहरबाट करिब ५० किलोमिटर पश्चिममा फैलिएको आगो नियन्त्रणका लागि करिब ८ सय अग्निनियन्त्रक, सयौँ जाँडार्म (अर्धसैनिक प्रहरी) र सैनिक परिचालन गरिएको छ।

अग्निनियन्त्रकका अनुसार हालसम्म करिब ३ हजार ४ सय हेक्टर जंगल जलेको छ, जुन क्षेत्रफल जिब्राल्टरको क्षेत्रफलभन्दा करिब पाँच गुणा ठूलो हो। डढेलोका कारण तीनवटा घरमा क्षति पुगेको छ भने एउटा क्याराभान पूर्ण रूपमा जलेको छ। अहिलेसम्म मानवीय क्षतिको खबर भने आएको छैन। फ्रान्सले सहयोग मागेपछि युरोपेली संघले आगो निभाउन तीनवटा पानी बोक्ने विशेष विमान पठाएको जनाएको छ।

जलवायु परिवर्तनसँग जोडिएका चरम मौसमी अवस्थाका कारण फ्रान्सले मे महिनायता लगातार तीन पटक गर्मीको लहर (हीटवेभ) सामना गरिसकेको छ। तीव्र गर्मीका कारण हजारौँ मानिसको मृत्यु भएको, नदीहरू सुक्दै गएको र डढेलोको जोखिम बढेको अधिकारीहरूले बताएका छन्।

लेजे–क्याप–फेरेतका मेयर फिलिप दे गोनभिलले भने, ‘३० डिग्री सेल्सियसभन्दा बढी तापक्रम र पूर्व तथा उत्तरपूर्वबाट चलेको बलियो हावाका कारण आगो नियन्त्रण गर्न कठिन भइरहेको छ।’

यसै साता बोर्डो विमानस्थल नजिकको अर्को डढेलो निभाउने क्रममा दुई जना अग्निनियन्त्रकको मृत्यु भएको थियो। अग्निनियन्त्रकहरूको सङ्घले आवश्यक स्रोत–साधनको अभाव र कर्मचारी अत्यधिक थाकेको भन्दै सरकारको आलोचना गरेको छ। यसै महिनाको सुरुमा पेरिसनजिक रहेको युनेस्को विश्व सम्पदा सूचीमा सूचीकृत फन्टेनब्लो जंगलको करिब १० प्रतिशत भाग डढेलोले नष्ट गरेको थियो। सन् २०२२ मा पनि फ्रान्समा डढेलोका कारण करिब ३० हजार हेक्टर जंगल जलेको थियो र करिब ५० हजार मानिसलाई सुरक्षित स्थानमा सार्नुपरेको थियो।

युरोपभरि यस सिजनमा लगातार तीन पटकको गर्मीको लहरले खडेरीलाई तीव्र बनाएको छ। पानीको आपूर्तिमा कमी आउनुका साथै वनस्पतिहरू सुक्खा भएका छन्, जसले गर्दा विश्वको सबैभन्दा छिटो तापक्रम बढिरहेको यो महादेशमा विगत दुई दशकको वार्षिक औसतभन्दा बढी जमिन डढेलोले डढाएको छ। गर्मीका कारण युरोपभर हजारौँ मानिसको मृत्यु भइसकेको छ।