जम्मु-कास्मिरको अनन्तनागमा प्रहरी जवानको हत्या

अनन्तनाग । भारतको जम्मु-कास्मिरस्थित अनन्तनाग सहरमा बुधबार आतङ्कवादीले गोली चलाउँदा एक प्रहरी जवानको मृत्यु भएको छ। अनन्तनागस्थित लाल चोकमा दिउँसो करिब १२:३० बजे उक्त आक्रमण भएको हो।

बडगाम जिल्लाको बीरवाह निवासी कुरैशीलाई आक्रमणलगत्तै अनन्तनागस्थित सरकारी मेडिकल कलेज अस्पताल पुर्‍याइए पनि चिकित्सकहरूले मृत घोषित गरेका थिए। हाल प्रक्रिया अनुसार कानुनी तथा चिकित्सकीय कारबाही अघि बढाइएको छ।

घटनालगत्तै सुरक्षा फौजले उक्त क्षेत्रलाई घेराबन्दी गरी आक्रमणकारीको खोजीका लागि बृहत् अपरेसन सुरु गरेको छ। जम्मु-कास्मिरका उपराज्यपालले अनन्तनागमा भएको आतङ्कवादी आक्रमणपछि सुरक्षा परिस्थितिको समीक्षा गर्न डीजीपी नलिन प्रभातसँग कुराकानी गरेका छन्।

‘कर्तव्य पालनाका क्रममा जीवन उत्सर्ग गर्ने हेड कन्स्टेबल आशिक हुसेन कुरैशीको परिवारप्रति म हार्दिक समवेदना व्यक्त गर्दछु,’ उपराज्यपालले भने, ‘शहीदको परिवारसँग सम्पूर्ण देश काँधमा काँध मिलाएर उभिएको छ। म यो कायरतापूर्ण आक्रमणको कडा शब्दमा भर्त्सना गर्दछु।’ यो जघन्य अपराधको सजाय नपाई नरहने र जम्मु-कास्मिर प्रहरी तथा सुरक्षा फौज मैदानमा खटिएर दोषीलाई कानुनी दायरामा ल्याउने उनले स्पष्ट पारेका छन्।