बैंककको बारमा आगलागी, मृत्यु हुनेको संख्या ३० पुग्यो

काठमाडौं । थाइल्यान्डको राजधानी बैंककस्थित एक बारमा भएको भीषण आगलागीमा मृत्यु हुनेको संख्या ३० पुगेको छ। घटनामा दर्जनौं व्यक्ति घाइते भएका छन् भने सुरक्षा मापदण्डको बेवास्ताका कारण दुर्घटना भएको हुन सक्ने आशंकामा प्रहरीले अनुसन्धान थालेको छ।प्रहरीका अनुसार आगलागी आइतबार राति बारको मञ्च नजिकबाट सुरु भएको थियो। बारको सजावटमा प्रयोग गरिएका अत्यधिक ज्वलनशील सामग्रीका कारण आगो केही सेकेन्डमै तीव्र रूपमा फैलिएको प्रारम्भिक निष्कर्ष निकालिएको छ।

प्रहरी प्रमुख कित्तिरात फानफेटले सुरक्षाप्रति पर्याप्त सावधानी नअपनाइएको र ग्राहकहरूको सुरक्षालाई बेवास्ता गरिएको देखिएको बताएका छन्। आगलागीमा मृत्यु भएका ३० जनामध्ये हालसम्म २७ जनाको पहिचान भइसकेको छ। ७० भन्दा बढी घाइतेमध्ये २४ जनाको अवस्था गम्भीर रहेको अधिकारीहरूले जनाएका छन्।

प्रारम्भिक अनुसन्धानअनुसार बारको एयर कन्डिसनरमा भएको सर्ट सर्किटबाट आगलागी सुरु भएको थियो। त्यसपछि विद्युत् आपूर्ति बन्द हुँदा बारभित्र अन्धकार छाएको र मानिसहरू बाहिर निस्कन थप कठिन भएको बताइएको छ।

प्रत्यक्षदर्शीका अनुसार आगो सुरु भएको केही सेकेन्डमै मञ्च पूरै ज्वालाले ढाकिएको थियो। घटनाका बेला प्रस्तुति दिइरहेको थाई स्वतन्त्र सङ्गीत समूह थोत्साकानका दुई सदस्यको पनि आगलागीमा मृत्यु भएको छ।