क्रिमिया नजिक रुसी जहाजहरूमा युक्रेनी आक्रमण

किभ । युक्रेनले रुसद्वारा कब्जा गरिएको क्रिमिया नजिकका समुद्री मार्गहरूमा आक्रमण तीव्र बनाउँदै रुसी इन्धन आपूर्ति प्रणालीलाई कमजोर पार्ने प्रयासलाई थप तीव्र बनाएको छ । युक्रेनको ड्रोन बलका कमान्डर रोबर्ट ब्रोभ्दी ‘माज्यार’ का अनुसार पछिल्ला चार दिनमा आजोभ सागर क्षेत्रमा कम्तीमा २५ वटा जहाजमा ड्रोन आक्रमण गरिएको हो ।

जसका कारण ती जहाजहरूमा आगलागी भएको छ । युक्रेनी सेनाले भने कुल ३६ वटा जहाजमा प्रहार गरिएको दाबी गरेको छ । तीमध्ये अधिकांश रुसको छद्म नामधारी जहाज सञ्जालका व्यावसायिक तेल ट्याङ्कर रहेको दाबी गरिएको छ ।

आजोभ सागरमा, विशेषगरी कब्जामा रहेको क्रिमियाको उत्तरपूर्वी तट नजिक, तेल ट्याङ्करहरूको उपस्थिति सामान्य मानिन्छ । किनभने क्रिमियाको केर्च बन्दरगाहमा स्थलमार्गबाट तेल लोड गर्ने सुविधा रहेको छ । गत महिना युक्रेनले केर्च बन्दरगाहमा पनि आक्रमण गरेको थियो । त्यसपछि उपग्रह तस्बिरहरूको विश्लेषणले उक्त क्षेत्रमा रहेका तेल ट्याङ्करहरूको सङ्ख्या उल्लेखनीय रूपमा घटेको देखाएको छ ।

जुलाई ६ देखि ९ सम्म भएका आक्रमणहरूको विवरण रोबर्ट ब्रोभ्दीले सार्वजनिक गरेका छन् । मंगलबार बिहानदेखि ती आक्रमणका रातकालीन भिडियोहरू सामाजिक सञ्जालमा देखिन थालेका थिए ।

रुसको रोस्तोभ क्षेत्रका गभर्नर युरी स्ल्युसारले बुधबार तागानरोग खाडीमा दुई वटा खाली तेल ट्यांकरमाथि ड्रोन आक्रमण भएको पुष्टि गरेका छन् । उनका अनुसार ती जहाजहरू बिहीबारसम्म पनि जलिरहेका थिए ।

ब्रोभ्दीका अनुसार यसअघि आक्रमण गरिएका दुई ट्यांकरमध्ये प्रत्येकमा करिब ७ हजार टन इन्धन थियो, जुन तागानरोग क्षेत्रबाट क्रिमियातर्फ लैजाँदै गरिएको थियो ।

बुधबार खिचिएको एउटा उपग्रह तस्बिरमा क्रिमियाको तटबाट करिब ४.२ किलोमिटर टाढा रहेको एउटा जहाजबाट ठुलो धुवाँको मुस्लो उठिरहेको देखिएको छ ।