ट्रम्प प्रशासनलाई कम्पनीको ५ प्रतिशत हिस्सा दिँदैछ ओपनएआई

क्यालिफोर्निया । अमेरिकी एआई कम्पनी ओपनएआईले अमेरिकी राष्ट्रपति डोनाल्ड ट्रम्पको नेतृत्वको प्रशासनलाई कम्पनीमा ५ प्रतिशत हिस्सेदारी दिने प्रस्तावबारे प्रारम्भिक छलफल गरिरहेको छ  । अन्तर्राष्ट्रिय सञ्चारमाध्यम फाइनान्सियल टाइम्सका अनुसार प्रारम्भिक चरणमा रहेको उक्त प्रस्तावअनुसार अन्य अमेरिकी कृत्रिम बौद्धिकता (एआई) कम्पनीहरूले पनि सरकारलाई यस्तै हिस्सेदारी दिन सक्ने सम्भावनाबारे छलफल भइरहेको छ ।

समाचारअनुसार ओपनएआईका प्रमुख कार्यकारी अधिकृत साम अल्टम्यानले यस्तो व्यवस्था भए एआईबाट हुने आर्थिक लाभ आमनागरिकसम्म पुग्ने तर्क गरेका छन् । यद्यपि, ओपनएआईले यसबारे कुनै टिप्पणी गरेको छैन भने ह्वाइट हाउसले पनि प्रतिक्रिया दिएको छैन । मार्चमा भएको पछिल्लो लगानी चरणका आधारमा ओपनएआईको मूल्याङ्कन ८ खर्ब ५२ अर्ब अमेरिकी डलर पुगेको थियो । त्यसअनुसार कम्पनीको ५ प्रतिशत हिस्सेदारीको मूल्य करिब ४२ अर्ब ६० करोड डलर बराबर हुनेछ ।

बिहीबार सीएनबीसीसँगको अन्तर्वार्तामा ट्रम्पले निजी कम्पनीमा संघीय सरकारले हिस्सेदारी लिनु धेरै अमेरिकी शैलीको कदम भएको टिप्पणी गरेका थिए । उनले सरकारको लगानीपछि चिप निर्माता कम्पनी इन्टेलको अवस्था सुधारिएको उदाहरण पनि दिएका थिए । यसैबीच, ओपनएआई र एन्थ्रोपिक दुवैले विकास गरिरहेका नयाँ एआई मोडेलहरू सरकारी समीक्षा र नियामकीय निगरानीका कारण ढिलाइ भएको जनाइएको छ । एनथ्रोपिकले आफ्नो अत्याधुनिक एआई मोडेलमाथिको निर्यात नियन्त्रण अमेरिकी सरकारले हटाएको जनाएको छ ।