गुणस्तर परीक्षणमा एआईले अपेक्षित नतिजा दिन नसकेपछि फोर्डले पुनः नियुक्त गर्‍यो अनुभवी इन्जिनियर

क्यालिफोर्निया । अमेरिकी अटो मोबाइल निर्माता कम्पनी फोर्डले कृत्रिम बौद्धिकता (एआई) प्रणालीले अपेक्षित स्तरको गुणस्तर परीक्षण गर्न नसकेपछि केही अनुभवी मानव इन्जिनियरलाई पुनः नियुक्त गरेको जनाएको छ ।

खर्च घटाउने र उत्पादकत्व बढाउने भन्दै कम्पनीले आफ्नो उत्पादन प्रणालीका विभिन्न क्षेत्रमा एआई प्रयोग गर्न थालेको थियो । कम्पनीले विशेष गरी गुणस्तर परीक्षणका लागि एआई प्रविधिको प्रयोग गरेको थियो । तर, कम्पनीका अधिकारीहरूका अनुसार स्वचालित प्रणालीले अनुभवी प्राविधिकहरूको सीप र अनुभवको बराबरी गर्न सकेन ।

उनले थपे, ‘अघिल्ला वर्षहरूमा हामीले धेरै उत्पादन चक्र पार गरेका अनुभवी इन्जिनियरहरूको ज्ञान र अनुभवलाई पर्याप्त महत्त्व दिन सकेनौँ,’ । फोर्डका प्रमुख कार्यकारी अधिकृत जिम फार्लीले गत वर्ष एआईले धेरै श्वेतपोश (अफिसमा काम गर्ने) कर्मचारीहरूको रोजगारीमा असर पार्न सक्ने बताएका थिए । कम्पनीले आफ्नो औद्योगिक प्रणालीभर एआई प्रविधि प्रयोग गरिरहेको जनाएको थियो ।

यसअन्तर्गत, फोर्डले आफ्ना कारखानाहरूमा ९०० वटा एआईबाट चल्ने क्यामेरा जडान गरेको थियो, जसको उद्देश्य उत्पादन प्रक्रियामै गुणस्तरसम्बन्धी समस्या पहिचान गर्नु र आपूर्ति शृङ्खलामा आउने अवरोध कम गर्नु थियो । तर, कम्पनीका भेइकल हार्डवेयर इन्जिनियरका उपाध्यक्ष  चार्ल्स पुनका अनुसार एआईमा आधारित गुणस्तर परीक्षण प्रणालीले कम्पनीको अपेक्षाअनुसार नतिजा दिन सकेन । उनले भने, ‘हामीले डिजाइनसम्बन्धी आवश्यक जानकारी एआईलाई उपलब्ध गराएपछि यसले स्वतः उच्च गुणस्तरको उत्पादन सुनिश्चित गर्छ भन्ने गलत अनुमान गरेका थियौँ ।’

उनका अनुसार, स्वचालित उपकरणहरूमा अनुभवी प्राविधिकहरूको सीप र अनुभवको कमी थियो । साथै, तीमध्ये धेरै प्राविधिक कम्पनी छोडिसकेकाले उनीहरूको ज्ञान एआई प्रणालीलाई प्रशिक्षण दिन प्रयोग गर्न सकिएको थिएन । हाल कम्पनीले पुनः नियुक्त गरिएका अनुभवी इन्जिनियरहरूलाई एआई प्रणालीलाई प्रशिक्षण दिन र युवा कर्मचारीलाई मार्गदर्शन गर्न परिचालन गरेको छ ।