दुबईमा तीन नयाँ महत्वाकांक्षी परियोजनाको घोषणा: विश्वकै पहिलो AI बाट डिजाइन गरिएको पार्क, दुबई क्रीकमा ८ किलोमिटर लामो आकर्षक प्रकाश सजावट र यूएईको सांस्कृतिक सम्पदा झल्काउने क्षेत्रकै पहिलो फाल्कन मार्केट

प्रवास दुवई, यूएई|

दुबईले बासिन्दा तथा पर्यटकहरूको जीवनस्तर अझ उकास्ने उद्देश्यले तीन नयाँ महत्वाकांक्षी परियोजनाको घोषणा गरेको छ। यी परियोजनामा कृत्रिम बुद्धिमत्ता (AI) को प्रयोगबाट डिजाइन गरिने विश्वकै पहिलो पार्क, दुबई क्रीक क्षेत्रमा ८ किलोमिटर लामो आकर्षक प्रकाश सजावट योजना तथा क्षेत्रकै पहिलो फाल्कन बजार समावेश छन्।

दुबईका युवराज तथा उपप्रधानमन्त्री महामहिम शेख हमदान बिन मोहम्मद बिन राशिद अल मकतूमले सामाजिक सञ्जालमार्फत यी परियोजनाहरू सार्वजनिक गर्दै तिनले दुबईको सांस्कृतिक पहिचान, प्रविधि र आधुनिक जीवनशैलीलाई एकैसाथ जोड्ने बताए।

घोषित परियोजनामध्ये दुबई फाल्कन मार्केट क्षेत्रकै पहिलो विशेष बजार हुनेछ। यसले यूएईको समृद्ध सांस्कृतिक सम्पदा र बाज पालन (फाल्कनरी) परम्परालाई आधुनिक स्वरूपमा प्रस्तुत गर्ने अपेक्षा गरिएको छ। फाल्कन यूएईको राष्ट्रिय पहिचान र गौरवको प्रतीक मानिन्छ।

त्यसैगरी, दुबई क्रीक लाइटिङ परियोजना अन्तर्गत ऐतिहासिक दुबई क्रीक क्षेत्रको करिब ८ किलोमिटर क्षेत्रलाई अत्याधुनिक प्रकाश व्यवस्थामार्फत नयाँ आकर्षणका रूपमा विकास गरिनेछ।

परियोजनाको अर्को विशेषता विश्वकै पहिलो AI–डिजाइन गरिएको पार्क हो। स्थानीय समुदायको सहभागिता, तथ्याङ्क विश्लेषण तथा कृत्रिम बुद्धिमत्ताको प्रयोगमार्फत पार्कको अवधारणा तयार गरिनेछ, जसले भविष्यका सार्वजनिक खुला स्थानहरूको विकासमा नयाँ मापदण्ड स्थापित गर्ने विश्वास गरिएको छ।

शेख हमदानले दुबईले सम्पदा संरक्षण, नवीन प्रविधि र जीवनको गुणस्तर सुधारलाई प्राथमिकतामा राख्दै भविष्य उन्मुख योजनाहरूमा निरन्तर लगानी गरिरहेको बताएका छन्।