शारजाह–दुबई यात्रुका लागि राहत : अल तावुन क्षेत्रमा सुरुङ निर्माण सुरु

प्रवास दुवई, यूएई

शारजाह र दुबईबीच दैनिक आवतजावत गर्ने हजारौं यात्रुका लागि राहतको खबर आएको छ। शारजाहमा लामो समयदेखि ट्राफिक जामको समस्याले चर्चामा रहेको अल तावुन क्षेत्रमा सुरुङ निर्माणको काम सुरु गरिएको छ।

परियोजनाअन्तर्गत अल तावुन राउन्डअबाउटमुनि नयाँ सुरुङ निर्माण गरिनेछ, जसले यस क्षेत्रमा हुने सवारी चाप व्यवस्थापन गर्न महत्वपूर्ण भूमिका खेल्ने अपेक्षा गरिएको छ। विशेषगरी कार्यालय समयको बिहान र साँझ अल तावुन, अल नहदा र आसपासका क्षेत्रमा घण्टौंसम्म हुने ट्राफिक जामलाई कम गर्ने लक्ष्यसहित यो परियोजना अघि बढाइएको हो।

निर्माण कार्यलाई सहज बनाउन सम्बन्धित निकायले केही सडक खण्डमा अस्थायी ट्राफिक डाइभर्सन लागू गरेको छ। चालकहरूलाई वैकल्पिक मार्ग प्रयोग गर्न आग्रह गरिएको छ भने सडक संकेतहरूको पालना गर्न अनुरोध गरिएको छ।

अधिकारीहरूका अनुसार सुरुङ निर्माण सम्पन्न भएपछि शारजाह–दुबईबीचको यात्रा समय घट्नुका साथै सवारी आवागमन थप सुरक्षित र व्यवस्थित हुने विश्वास गरिएको छ। दैनिक रूपमा दुबई आउने–जाने हजारौं सर्वसाधारणले यो परियोजनाबाट प्रत्यक्ष लाभ लिन सक्ने अपेक्षा गरिएको छ।