अमेरिका-इरान शान्ति सम्झौताको पर्खाइमा सुनको मूल्य स्थिर

न्युयोर्क । पछिल्लो सत्रमा एक सातायताकै उच्च विन्दुमा पुगेको सुनको मूल्य मंगलबार बजारमा लगभग स्थिर देखिएको छ। अमेरिका र इरानबिच हुन लागेको शान्ति सम्झौताको थप विवरण आउने पर्खाइमा लगानीकर्ताहरू रहेकाले मूल्यमा ठुलो उतारचढाव नआएको हो। सोमबार मात्रै सुनको मूल्य ३.६ प्रतिशत सम्मले बढेर जुन ५ यताकै उच्च विन्दुमा पुगेको थियो। अन्तर्राष्ट्रिय बजारमा मंगलबार स्पट गोल्डको मूल्य प्रतिऔंस शून्य दशमलव २ प्रतिशतले बढेर ४,३१५.८७ डलर कायम भएको छ ।

मारेक्सका विश्लेषक एडवर्ड मेरका अनुसार इरानसँग सम्बन्धित समाचार बाहिरिएपछि गत बिहीबारदेखि नै सुनको मूल्यमा राम्रो वृद्धि देखिएको छ र यो उत्साहपूर्ण वृद्धि शुक्रबार हुने औपचारिक हस्ताक्षर समारोहसम्म कायम रहने सम्भावना छ।

यसैबिच, बैंक अफ जापानको ब्याजदरसम्बन्धी निर्णय आउनुअघि अमेरिकी डलरको सूचकांक १० दिनयताकै न्यून विन्दु नजिक सङ्कुचित भएको छ। बजारका लगानीकर्ताहरू अमेरिकी केन्द्रीय बैंक फेडेरल रिजर्भको आगामी नीतिगत निर्णय र नयाँ अध्यक्ष केभिन वार्शको वक्तव्यको पर्खाइमा छन्।

यस पटक ब्याजदरमा कुनै परिवर्तन नहुने अनुमान बजारले गरेको छ। विश्लेषक मेरका अनुसार बजारले यस वर्ष ब्याजदर घट्ने अपेक्षा नगरेको भए पनि यदि अध्यक्ष वार्शले यसै वर्षको उत्तरार्धमा ब्याजदर कटौती हुन सक्ने संकेत गरेमा डलर थप कमजोर हुनेछ र सुनको मूल्यमा फेरि अर्को ठूलो उछाल आउनेछ। तर, यसको विपरीत यदि उनले ब्याजदर कडा राख्ने संकेत गरेमा सुनको मूल्यमा केही दबाब पर्न सक्छ।

ब्याजदर उच्च रहँदा सुनको आकर्षण घट्ने गर्दछ किनभने सुनबाट ब्याज जस्तो नियमित आम्दानी हुँदैन। शान्ति सम्झौतापछि आगामी डिसेम्बर महिनामा अमेरिकाले ब्याजदर बढाउन सक्ने सम्भावना भने घटेको छ। सीएमई फेडवाच टुलका अनुसार गत साता ब्याजदर बढ्ने सम्भावना ७० प्रतिशत अनुमान गरिएकोमा अहिले त्यो घटेर ५७ प्रतिशतमा झरेको छ।

यसैबिच, वित्तीय संस्था सिटीले आगामी शून्यदेखि तीन महिनाका लागि सुनको मूल्यको पूर्वानुमानलाई प्रतिऔंस ५०० डलरले बढाउँदै ४,५०० डलर पुग्ने प्रक्षेपण गरेको छ। अन्य बहुमूल्य धातुहरूमा भने केही गिरावट आएको छ। स्पट सिल्भर (चाँदी) को मूल्य १ प्रतिशतले घटेर प्रतिऔंस ६९.२९ डलर कायम भएको छ भने प्लेटिनम शून्य दशमलव ९ प्रतिशतले घटेर १,७५१.५५ डलर र प्यालेडियम १.६ प्रतिशतले घटेर १,३२७.२७ डलरमा झरेको छ।