ट्रम्पको ‘युद्ध अन्त्य’ को दाबीमाथि इरानी कट्टरपन्थी नेताको आशंका

तेहरान । अमेरिकी राष्ट्रपति डोनाल्ड ट्रम्पको युद्ध अन्त्यका लागि अमेरिका–इरान महान् सम्झौता नजिक पुगेको दाबीलाई इरानका वरिष्ठ कट्टरपन्थी सांसद इब्राहिम रेजाईले अविश्वसनीय र सम्भावित छलपूर्ण भएको बताएका छन् । रेजाईले सामाजिक सञ्जाल एक्समा लेख्दै ट्रम्पले अहिलेको अवस्थालाई शान्त राख्न मात्र यस्तो अभिव्यक्ति दिएको हुन सक्ने बताए । ट्रम्पले धोका दिन खोजेको सम्भावना उच्च रहेको भन्दै इरानले आफ्नो सैन्य कारबाही जारी राख्नुपर्नेमा उनले जोड दिए ।

यसअघि बिहीबार राति ट्रम्पले आफूले इरानसँगको युद्ध अन्त्य गराएको र महान् सम्झौता हासिल भएको बताएका थिए । तर त्यसको केही घण्टाअघि मात्रै उनले इरानमाथि अत्यन्त कडा आक्रमण गर्ने चेतावनी दिएका थिए र इरानको प्रमुख तेल निर्यात केन्द्र खर्ग टापुलाई निशाना बनाउने सङ्केत गरेका थिए । पछि उनले त्यस्ता योजनाबद्ध आक्रमणहरू रद्द गरेको बताए ।

रेजाईले अर्को सन्देशमा अमेरिकालाई खर्ग टापुमा आक्रमण नगर्न चेतावनी दिँदै उनीहरू आए जीवित फर्किने बताएका थिए । खर्ग टापु इरानको आर्थिक जीवनरेखा मानिन्छ । इरानको करिब ९० प्रतिशत कच्चा तेल निर्यात यही टापुमार्फत हुने भएकाले यसको रणनीतिक महत्त्व अत्यन्त धेरै छ ।

सम्झौताबारे ट्रम्पको दाबीमाथि शंका गर्नेमा रेजाई एक मात्रै नेता होइनन् । इरानका अन्य कट्टरपन्थी समूहहरूले पनि ट्रम्प र अमेरिकाप्रति अविश्वास व्यक्त गर्दै आएका छन् । विशेषगरी जेबे–ये पयदारी (एन्ड्युरेन्स फ्रन्ट) नामक प्रभावशाली कट्टरपन्थी समूहले अमेरिकासँगको सम्भावित सम्झौतालाई आत्मसमर्पणसरह ठान्दै त्यसको विरोध गर्दै आएको छ ।