हजबाट फर्किएका तीर्थयात्रीलाई दुबई विमानस्थलमा फूल र उपहारसहित स्वागत

प्रवास दुवई, यूएई| संयुक्त अरब इमिरेट्स (यूएई) ले हज यात्रा सम्पन्न गरी स्वदेश फर्किएका तीर्थयात्रीहरूलाई दुबई अन्तर्राष्ट्रिय विमानस्थलमा विशेष स्वागत गरेको छ।

हजबाट फर्किएका यात्रुहरूलाई विमानस्थलमा फूल, उपहार तथा विशेष स्वागत सन्देशमार्फत सम्मान व्यक्त गरिएको थियो। स्वागत कार्यक्रममा बालबालिकाले तीर्थयात्रीहरूलाई फूल प्रदान गरेका थिए भने सम्बन्धित अधिकारीहरूले उनीहरूको सहज आगमनका लागि विशेष व्यवस्था मिलाएका थिए।

दुबई विमानस्थल प्रशासनका अनुसार हज यात्रुहरूको आगमनलाई सहज बनाउन अतिरिक्त कर्मचारी परिचालन, विशेष सेवा काउन्टर तथा द्रुत आव्रजन प्रक्रिया लागू गरिएको थियो। यसले यात्रुहरूलाई छिटो र सहज रूपमा गन्तव्यसम्म पुग्न सहयोग गरेको बताइएको छ।

यूएईले हरेक वर्ष हज यात्रुहरूको आगमन तथा प्रस्थानलाई व्यवस्थित बनाउन विभिन्न सेवा तथा सुविधाहरू उपलब्ध गराउँदै आएको छ। यस वर्ष पनि तीर्थयात्रीहरूको सम्मान र स्वागतका लागि गरिएको विशेष व्यवस्थाले यूएईको आतिथ्यता र सेवामुखी संस्कृतिलाई थप उजागर गरेको छ।