दुबई यूएई, धर्म–संस्कृति/रीतिथिति, प्रदेश, प्रबास, बिश्व, मुख्य समाचार, विश्व
दुबईमा भव्य रूपमा आयोजना हुँदै “तिज धमाका सिजन २”, कलाकार पुष्कल शर्माको विशेष प्रस्तुति रहने
प्रवास दुबई, यूएई| नेपाली महिलाहरूको महान पर्व हरितालिका तिजको अवसर पारेर संयुक्त अरब इमिरेट्स (यूएई) को दुबईमा “तिज धमाका सिजन २” भव्य रूपमा आयोजना हुने भएको छ। नेपाली कला, संस्कृति तथा मौलिक परम्परालाई प्रवर्द्धन गर्ने उद्देश्यले श्री लक्ष्मी ज्वेलरी परिवारको प्रस्तुतिमा उक्त विशेष सांगीतिक तथा सांस्कृतिक कार्यक्रम आयोजना गर्न लागिएको हो।
आयोजकका अनुसार कार्यक्रम आगामी अगस्त ३०, २०२६ आइतबार दुबईस्थित “रक नमस्ते रेस्टो इन्ड बार, एस्टोरिया होटल बार” मा बिहान ९ बजेदेखि साँझ ५:३० बजेसम्म सञ्चालन हुनेछ। कार्यक्रमलाई विशेष रूपमा तिज पर्वको उल्लाससँगै सामाजिक सेवासँग जोडिएको बताइएको छ।
यस वर्षको “तिज धमाका सिजन २” को मुख्य उद्देश्य अनाथ तथा असहाय बालबालिकालाई सहयोग गर्नु रहेको आयोजकले जनाएको छ। नेपाली समुदायबीच सांस्कृतिक एकता, आत्मीयता तथा मनोरञ्जन अभिवृद्धि गर्दै सामाजिक उत्तरदायित्व निर्वाह गर्ने सोचका साथ कार्यक्रम आयोजना गर्न लागिएको हो।
कार्यक्रममा चर्चित लोक तथा दोहोरी गायक, सर्जक तथा मोडल पुष्कल शर्मा विशेष अतिथिका रूपमा सहभागी हुनेछन्। पछिल्लो समय नेपाली लोकसंगीत क्षेत्रमा अत्यन्त लोकप्रिय रहेका शर्मा आफ्ना चर्चित तिज गीत तथा सांगीतिक प्रस्तुतीमार्फत दर्शकलाई भरपुर मनोरञ्जन दिने अपेक्षा गरिएको छ। साथै कार्यक्रममा स्थानीय कलाकारहरूको समेत आकर्षक प्रस्तुति रहने आयोजकले जानकारी दिएको छ।
प्रवासमा रहेर पनि नेपाली संस्कृति र चाडपर्वलाई निरन्तर जगेर्ना गर्दै आएका नेपाली समुदायका लागि “तिज धमाका सिजन २” विशेष आकर्षणको केन्द्र बन्ने विश्वास लिइएको छ। तिज गीत, नृत्य, सांस्कृतिक प्रस्तुति, मनोरञ्जन तथा सामाजिक सद्भावले भरिपूर्ण कार्यक्रममार्फत नेपालीपनको झल्को दिलाउने आयोजकको भनाइ छ।
आयोजक श्री लक्ष्मी ज्वेलरी परिवारले यूएईमा रहेका सम्पूर्ण नेपाली दिदीबहिनी तथा दाजुभाइहरूलाई कार्यक्रममा सहभागी भई कार्यक्रमको शोभा बढाइदिन हार्दिक अनुरोध गरेको छ। “यहाँहरूको गरिमामय उपस्थितिले कार्यक्रमलाई अझ सफल र स्मरणीय बनाउनेछ,” आयोजकले जनाएको छ।
त्यसैगरी कार्यक्रमबाट संकलित सहयोग रकम अनाथ तथा असहाय बालबालिकाको हितमा प्रयोग गरिने जानकारी दिइएको छ। सामाजिक सेवासँगै नेपाली कला, संस्कृति र परम्पराको संरक्षण तथा प्रवर्द्धनमा समेत कार्यक्रमले महत्वपूर्ण योगदान पुर्याउने अपेक्षा गरिएको छ।
यूएईमा रहेका नेपाली समुदायबीच पछिल्लो समय सांस्कृतिक तथा सामाजिक कार्यक्रमहरूको सक्रियता बढ्दै गएको अवस्थामा “तिज धमाका सिजन २” लाई प्रवासी नेपालीहरूको ठूलो पर्वका रूपमा हेरिएको छ। कार्यक्रमले नेपाली समुदायलाई एकताबद्ध गर्दै मनोरञ्जन र सामाजिक सेवाको सन्देश दिने विश्वास आयोजकले व्यक्त गरेका छन्।
