दुबई यूएई, देश, प्रबास, मुख्य समाचार
Gulf News मा प्रकाशित प्रेरणादायी कथा — वेटरदेखि सफल व्यवसायी र समाजसेवीसम्मको अविश्वसनीय यात्रा
प्रवास दुबई, यूएई| यूएईमा संघर्ष, मेहनत र आत्मविश्वासका साथ सफलताको उचाइ चुम्न सफल नेपाली युवा रुद्र थापाको प्रेरणादायी कथा आज अन्तर्राष्ट्रिय सञ्चारमाध्यम Gulf News मा प्रकाशित भएको छ। सन् २०१३ मा एक सांगीतिक कार्यक्रममा गायकका रूपमा यूएई आएका थापाले सुरुवातमा यहाँ बस्ने योजना बनाएका थिएनन्। तर यूएईको सुरक्षित वातावरण, अवसर र विकासले प्रभावित बनेपछि उनले यहीँ आफ्नो भविष्य निर्माण गर्ने निर्णय गरेका हुन्।
विदेशी भूमिमा सुरुवाती दिनहरू उनका लागि सहज थिएनन्। उनले होटल क्षेत्रमा वेटरको रूपमा काम गरे, त्यसपछि सेक्युरिटी गार्ड र मर्चेन्डाइजरका रूपमा पनि काम गर्नुपर्यो। विभिन्न चुनौती र संघर्षका बीच पनि उनले आफ्नो सपना त्यागेनन्। निरन्तर मेहनत, सकारात्मक सोच र आत्मविश्वासकै कारण उनी आज सफल व्यवसायी बन्न पुगेका छन्।
वर्षौंको अनुभव र बचतपछि उनले सन् २०२३ मा “Trusted Key Typing Centre” स्थापना गरे। हाल उक्त व्यवसाय दुबई र शारजाहमा सफलतापूर्वक सञ्चालन भइरहेको छ। सुरुमा पूर्णकालीन जागिरसँगै व्यवसाय चलाएका थापाले पछि आफ्नो सम्पूर्ण समय व्यवसायमै केन्द्रित गरेका थिए।
रुद्र थापा व्यवसायमा मात्र सीमित छैनन्, उनी सामाजिक सेवामा समेत उत्तिकै सक्रिय छन्। हाल उनी नेपाल एसोसिएसन यूएईका उपाध्यक्ष तथा गुल्मी वेलफेयर सोसाइटी यूएईका संरक्षकका रूपमा कार्यरत छन्। उनले यूएईमा रहेका नेपालीहरूको कानुनी, सामाजिक तथा कल्याणकारी समस्यामा सहयोग पुर्याउँदै आएका छन्।
Gulf News मा प्रकाशित उनको सफलताको कथाको लिंक मुनी दिएकाे छ।
Gulf News मा प्रकाशित उनको सफलताको कथाले यूएईमा रहेका नेपाली समुदायलाई मात्र होइन, विदेशमा संघर्ष गरिरहेका हजारौं नेपाली युवालाई प्रेरणा दिएको छ। सामान्य कामबाट सुरु गरेर आज सम्मानित व्यवसायी र समाजसेवी बन्न सफल थापाको यात्रा नेपाली समुदायका लागि गर्वको विषय बनेको छ।
उनले दिएको सन्देश पनि उत्तिकै प्रेरणादायी छ — “सकारात्मक सोच, निरन्तर मेहनत र स्पष्ट लक्ष्य भए सफलताको बाटो अवश्य खुल्छ।”
रुद्र थापाको यो सफलताको कथा आज नेपाली समुदायका लागि गर्व, प्रेरणा र आशाको उदाहरण बनेर अन्तर्राष्ट्रिय सञ्चारमाध्यममा स्थान बनाउन सफल भएको छ।
