उपत्यकाका पन्ध्र वटै क्षेत्रमा रास्वपा निर्वाचित

काठमाडौँ, फागुन २४ गते । राष्ट्रिय स्वतन्त्र पार्टी (रास्वपा) ले काठमाडौँ उपत्यका अन्तर्गत काठमाडौँ, ललितपुर, भक्तपुर जिल्लाका १५ क्षेत्रमै निर्वाचन जितेको छ । काठमाडौँका १० ललितपुरका तीन र भक्तपुरका दुई निर्वाचन क्षेत्र रास्वपाले जितेको हो । 

तत्कालीन नेकपा (माओवादी) को लहर आउँदासमेत २०६४ सालको पहिलो संविधान सभा निर्वाचनमा १५ क्षेत्रमध्ये सात क्षेत्रमा मात्रै निर्वाचन जितेको निर्वाचन आयोगले जनाएको छ । तत्कालीन नेपाल कम्युनिस्ट पार्टी (एमाले) र नेपाल कम्युनिस्ट पार्टी (माओवादी केन्द्र) बिच तालमेल हुँदासमेत २०७४ सालको निर्वाचनमा काठमाडौँका १५ मध्ये १० क्षेत्रमा मात्रै निर्वाचन जितेका थिए । यस्तै नेपाली कांग्रेस र माओवादी केन्द्रसहितका दल २०७९ सालमा चुनावी तालमेल गर्दा कुल सात सिट मात्रै जितेको इतिहास छ । निर्वाचनको इतिहासमा पहिलो पटक उपत्यकाका सबै क्षेत्र रास्वपाका उम्मेदवारले जितेका छन् । 

काठमाडौँका १० क्षेत्रमा रास्वपा

काठमाडौँ–१ बाट रास्वपाकी रञ्जु दर्शनाले १५ हजार ४५५ मत ल्याएर विजयी हुनुभयो भने निकटतम प्रतिद्वन्द्वी नेपाली कांग्रेसका प्रबल थापाले छ हजार ३६४ मत ल्याउनुभयो । राष्ट्रिय प्रजातन्त्र पार्टी (राप्रपा) का उम्मेदवार रवीन्द्र मिश्रले तीन हजार ९७२ मत ल्याएर तेस्रो पटक पराजित हुनुभएको हो । 

काठमाडौँ–२ बाट रास्वपाका सुनील केसीले २९ हजार १४२ मत ल्याएर निर्वाचित हुनुभएको छ भने निकटतम प्रतिद्वन्द्वी कांग्रेसका कबिर शर्माले आठ हजार ८२४ ल्याउनुभयो । राप्रपाकी कुन्तीदेवी पोखरेलले दुई हजार १३५ मत ल्याउनुभएको छ । 

काठमाडौँ–३ बाट रास्वपाका राजु पाण्डेले १८ हजार ७५७ मत ल्याएर निर्वाचित हुनुभयो भने उज्यालो नेपाल पार्टीका अध्यक्ष कुलमान घिसिङले ११ हजार १७१ मत ल्याएर पराजित हुनुभयो । कांग्रेसका उम्मेदवार रमेश अर्यालले छ हजार मत ल्याउँदा एमालेका उम्मेदवार रामेश्वर फुयाँलले तीन हजार ८१६ मत ल्याउनुभयो । काठमाडौँ–४ बाट रास्वपाका पुकार बमले २९ हजार १४२ मत ल्याएर निर्वाचित हुनुभयो भने कांग्रेसका सचिन तिमिल्सेनाले आठ हजार ८२४ मत, एमालेका राजन भट्टराईले पाँच  हजार ७३३ मत ल्याएर तेस्रो हुनुभयो ।

काठमाडौँ–५ बाट रास्वपाका सस्मित पोखरेलले ३० हजार ७३७ मत ल्याएर निर्वाचित हुनुभयो भने निकटतम प्रतिद्वन्द्वी कांग्रेसका पूर्वमन्त्री प्रदीप पौडेलले नौ हजार १५९ मत, एमालेका ईश्वर पोखरेलले चार हजार ७०१ मत ल्याएर तेस्रो हु्नुभयो । यस्तै काठमाडौँ–६ बाट शिशिर खनालले २७ हजार ७१९ मत प्राप्त ल्याई विजयी हुनुभयो भने कांग्रेसका कृष्ण बानियाँले छ हजार ६४७ मत र एमालेका अमन मास्केले चार हजार ३७३ मत ल्याउनुभयो । काठमाडौँ–७ बाट रास्वपाका गणेश पराजुलीले २७ हजार ८०५ मत प्राप्त गरेर निर्वाचित हुनुभयो भने निकटतम प्रतिस्पर्धी कांग्रेसका प्रमोदहरी गुरागाईंले तीन हजार ९८२ मत प्राप्त गर्नुभयो । नेकपाका वसन्तप्रसाद मानन्धरले तीन हजार ६६७, एमालेका प्रकाश श्रेष्ठले तीन हजार ५४४ मत ल्याउनुभयो ।

काठमाडौँ–८ बाट रास्वपाका विराजभक्त श्रेष्ठले २४ हजार ५९२ मत ल्याएर निर्वाचित हुनुभयो भने नेकपाका सुमन सायमीले तीन हजार २१७ मत, कांग्रेसकी सपना राजभण्डारीले दुई हजार ८३८ मत पाएर तेस्रो हुनुभयो । काठमाडौँ–९ बाट रास्वपाका डोलप्रसाद अर्यालले ३५ हजार ९३ मत ल्याएर निर्वाचित हुनुभयो भने कांग्रेसकी नानुमैया बाँस्तोलाले पाँच हजार ४६० मत, एमालेका अजयक्रान्ति शाक्यले चार हजार ५८० मत ल्याएर तेस्रो हुनुभयो । काठमाडौँ–१० बाट रास्वपाका प्रदीप विष्टले ३७ हजार ४६९ मत ल्याएर निर्वाचित हुनुभयो भने कांग्रेसका हिमाल कार्कीले आठ हजार १०० मत, एमालेका विनोद श्रेष्ठले चार हजार ८६४ मत ल्याएर तेस्रो हुनुभयो । 

भक्तपुरबाट खत्री र रञ्जित निर्वाचित 

नेपाल मजदुर किसान पार्टीको पकट मानिने भक्तपुर १ र २ मा रास्वपाका उम्मेदवार निर्वाचित हुनुभएको छ । २०४८ सालदेखि भक्तपुर–१ नेमकिपा, कांग्रेस र एमालेले जित्दै आएका थिए । यो निर्वाचनमा रास्वपाबाट भक्तपुर–१ बाट रुकेश रञ्जित र भक्तपुर–२ बाट राजीव खत्रीले निर्वाचन जित्नुभएको छ । 

रास्वपाका रञ्जितले ३३ हजार ४३६ मत ल्याएर निर्वाचित हुनुभयो भने नेमकिपाका प्रेम सुवालले २८ हजार १४७ मत ल्याएर दोस्रो  कांग्रेसका किरण न्यौपानेले चार  हजार १८२ मत ल्याएर तेस्रो हुनुभयो । भक्तपुर–२ बाट रास्वपाका राजीव खत्रीले ४२ हजार ३३४ मत ल्याएर निर्वाचित हुनुभयो भने निकटतम प्रतिद्वन्द्वी एमालेका महेश बस्नेतले १० हजार ९९६ मत ल्याएर दोस्रो कांग्रेसका कबिर राणाले आठ हजार ४०१ मत ल्याएर तेस्रो भई पराजित हुनुभयो ।

ललितपुरबाट महर्जन र कार्की निर्वाचित 

ललितपुर–१ बाट रास्वपाकी बुद्धरत्न महर्जनले २३ हजार ३७३ मत ल्याएर निर्वाचित हुनुभयो भने कांग्रेसका उदयशमशेर राणाले १३ हजार ५२० मत ल्याएर दोस्रो, एमालेका चेतनाथ सञ्जेलले छ हजार ५४६ मत ल्याएर तेस्रो हुनुभयो ।

ललितपुर–२ बाट रास्वपाका जगदीश खरेलले २२ हजार २३० मत ल्याएर विजयउन्मुख रहनुभएको छ । कांग्रेसका प्रेमकृष्ण महर्जनले दुई हजार ८७३ मत ल्याएर दोस्राे, एमालेका प्रेमबहादुर महर्जनले दुई हजार ४५१ मत ल्याएर तेस्रो स्थानमा हुनुहुन्छ । ललितपुर ३ बाट रास्वपाकी तोसिमा कार्कीले ४३ हजार ९६ मत ल्याएर निर्वाचित हुनुभएको छ भने कांग्रेसका जितेन्द्रकुमार श्रेष्ठले नौ हजार ४५ मत ल्याएर दोस्रो हुनुभएको छ भने नेकपाका राजकाजी महर्जनले छ हजार २२ मत ल्याएर तेस्रो हुनुभएको छ ।