नेपालको जेनजी आन्दोलनमा पत्नी गुमाएका एक भारतीयले १०० करोड भारु क्षतिपूर्तिको मागसहित दर्ता गराए मुद्दा

काठमाडौँ , माघ २७। गत भदौ २३ र २४ गतेको जेनजी प्रदर्शनका क्रममा पत्नी गुमाएका एक भारतीय नागरिकले १०० करोड भारु क्षतिपूर्तिको मागसहित मुद्दा दर्ता गराएका छन् ।

भारतीय सञ्चारमाध्यमका अनुसार रणवीर सिंह गोला नाम गरेका ती भारतीय नागरिकले दिल्ली उच्च न्यायालयमा मुद्दा दायर गरेका हुन् । उनले जेनजी आन्दोलनका क्रममा गत भदौ २४ गते आफ्नी पत्नी राजेश गोलाको मृत्यु भएको आफ्नो रिट निवेदनमा उल्लेख गरेका छन् ।

रणवीरले मुद्दामा भारतीय विदेश मन्त्रालय, काठमाडौँस्थित भारतीय दूतावास, काठमाडौँस्थित हयात रिजेन्सी होटललाई विपक्षी बनाएका छन् । होटल प्रशासनले पाहुनाहरूको सुरक्षाका लागि आश्वासन दिएको, ‘चेकआउट’ गर्नबाट रोकेको र आगजनी हुन थालेपछि माथिल्लो तलामा पठाएको उनको आरोप छ । भारतीय दूतावास र विदेश मन्त्रालयसँग पटक–पटक उद्धारका लागि याचना गरे पनि कुनै मद्दत नभएको उनले रिट निवेदनमा उल्लेख गरेका छन् ।

उक्त रिटमाथि दिल्ली उच्च न्यायालयका न्यायाधीश पुरुषैन्द्र कुमार कौरवको एकल इजलासमा सोमबार प्राथमिक सुनुवाइ भएको भारतीय सञ्चारमाध्यमले जनाएका छन् ।

यस क्रममा न्यायाधीश कौरवले नेपालमा भएको घटनाका सम्बन्धमा आफ्नो क्षेत्राधिकारबारे रिट निवेदक पक्षमाथि प्रश्न उठाएका थिए । उनले रिट निवेदनमा हयात होटललाई विपक्षी बनाएकोमा समेत आपत्ति जनाएका थिए ।

उनले रिट निवेदनमा संशोधन आवश्यक रहेको औँल्याउँदै २६ फेब्रुअरीसम्मका लागि यो मुद्दामा सुनुवाइ स्थगित गरेका छन् । रिट निवेदनमाथि आवश्यक संशोधन गरेरमात्र आगामी सुनुवाइ हुने अदालतले जनाएको छ ।