नासाको इतिहासमै पहिलोपटक ‘मेडिकल निकासी’, बिरामी अन्तरिक्ष यात्रीलाई पृथ्वी फर्काइँदै

न्युयोर्क । नासाले आफ्नो ६५ वर्षको इतिहासमा पहिलोपटक मेडिकल निकासी प्रक्रिया अपनाउँदै चार अन्तरिक्ष यात्रीलाई अन्तर्राष्ट्रिय अन्तरिक्ष स्टेसन (आईएसएस) बाट पृथ्वी फर्काउने निर्णय गरेको छ। एक जना अन्तरिक्ष यात्रीमा चिकित्सकीय हेरचाहको आवश्यकता देखिएपछि बुधबार तीन अन्य चालक दलका सदस्यसहित उनीहरूले स्टेसनबाट प्रस्थान गरेका हुन्।

यद्यपि निवर्तमान स्टेसन कमान्डर माइक फिन्केले ती यात्रीको अवस्था स्थिर र सुरक्षित रहेको जानकारी दिएका छन्। विस्तृत चिकित्सकीय मूल्याङ्कन पृथ्वीमै गर्न उपयुक्त हुने देखिएकाले उनीहरूको मिसन एक महिनाअघि नै छोट्याइएको नासाले जनाएको छ। यसअघि उनीहरू फेब्रुअरीको अन्त्यसम्म स्टेसनमै बस्ने कार्यतालिका थियो।

गत अगस्टमा प्रक्षेपण गरिएका यी यात्रीहरूको फिर्तीका लागि नासाले स्पेसएक्सको नियमित प्रवेश र स्प्ल्यासडाउन प्रक्रिया नै अपनाउनेछ। प्रशान्त महासागरमा रिकभरी जहाजसहित चिकित्सकहरूको टोली तयारी अवस्थामा राखिएको छ।

नासाका अनुसार यो स्वास्थ्य समस्या कुनै आपतकालीन परिस्थिति वा स्टेसन सञ्चालनसँग सम्बन्धित भने होइन। नासाका नयाँ प्रशासक जारेड आइज्याकम्यानले अन्तरिक्ष यात्रीहरूको स्वास्थ्य र कल्याण नै आफ्नो सर्वोच्च प्राथमिकता रहेको बताएका छन्।

यसअघि सन् १९८५ मा सोभियत अन्तरिक्ष यात्री भ्लादिमिर भास्युटिन स्वास्थ्य समस्याका कारण साल्युट–७ स्टेसनबाट चाँडै फर्किएका थिए। नासाले भने आफ्नो इतिहासमा पहिलोपटक यस्तो कदम चालेको हो। हाल आइएसएसमा एक अमेरिकी र दुई रुसी अन्तरिक्ष यात्री बाँकी छन् भने फेब्रुअरीको मध्यतिर नयाँ टोली पठाउने तयारी भइरहेको छ।