जेन्जी आन्दोलनप्रति समर्पित चलचित्र बिगुलको प्रचार प्रसार समुदाया स्तरमा

चितवन । जेन्जी आन्दोलनप्रति समर्पित चलचित्र बिगुलले फरक शैलीबाट प्रचार प्रसारलाई आक्रमक बनाएको छ । माघ ९ गतेको प्रदर्शन मिति नजिकिदै गर्दा प्रचार प्रसारलाई आक्रमक बनाईएको हो ।क्रान्तिसम्म र न्यायका लागि उठेको आवाजको कथामा बनेको चलचित्रको समुदायस्तरमा नै पुगेर प्रचार थालिएको हो । जस अन्तर्गत आज (शनिबार) चितवनमा आमा समूह र टोल सुधारलाई भेला पारेर चलचित्र प्रचार गरिएको छ ।

भरतपुर ६ चोकबजारमा चलचित्र प्रचार प्रसारका लागि छुट्टै बिशेष कार्यक्रम आयोजना गरिएको थियो । जसमा आमा समूह र टोलसुधार समूहको बाक्लो उपस्थिति रहेको थियो । कार्यक्रममा चलचित्रको ट्रेलर र गीत पनि देखाईएको थियो ।

कार्यक्रममा महिला सहभागीता बढी रहेको थियो । चलचित्रले युवा र महिलामा चेतना जगाइ भ्रष्टाचार र बिकृति उन्मुलनका लागि परिवर्तनको बिगुल फुकेकोले महिला सहभागीतालाई प्राथमिकता दिईएको निर्माण पक्षको भनाइ छ । सहभागीहरुले चलचित्रलाई लिएर उत्साहित रहेको बताएका थिए ।

कार्यक्रममा भरतपुर ६ का वडाध्यक्ष कृष्णलाल श्रेष्ठले वडाबासीहरु नै हलमा गएर चलचित्र हेर्ने बताए । उनले सम्पूर्ण वडाबासीको समर्थन चलचित्रलाई रहने बताए । भरतपुर २३ का वडाध्यक्ष दीपक दवाडीले आफ्ना वडाबासीहरु पनि चलचित्रलाई लिएर उत्साहित रहेको बताए । चलचित्रलाई चितवनबासीकै साथ रहने उनको भनाइ थियो ।

चलचित्रका लेखक तथा निर्देशक दिनेश कोइरालाले चलचित्रको माध्यमबाट पारिवारिक,सामाजीक न्याय र राजनीतिक सचेतनाबाट जन्मिएको नयाँ मार्ग, भुइँमान्छेहरुको सपना,संघर्ष र बलिदानीको इतिहास पर्दामा देखाउन खोजेको बताए ।

चलचित्र बिगुलमा उठाईएको बिषयबस्तु गत भदौमा जेन्जी युवाले गरेको देशब्यापी आन्दोलनसँग मेल खान्छ । पहिले नै तिनै बिषयमा केन्द्रित भइ फिल्म निर्माण गरिनु अचम्मको संयोग भएको निर्माण पक्षको भनाइ छ ।

बिगुलमा उठाएको मुल मुद्धा र पछि जेन्जी पुस्ताले उठाएका माग,देश बिकास र परिवर्तनप्रति आम नेपालीको चाहनाको बिषय ठ्याक्कै मिल्न गएको निर्माता तथा लेखक कोइरालाको भनाइ छ । यो चलचित्र जेन्जी आन्दोलनप्रति समर्पित गरिएको छ । चलचित्रले युवा र महिलामा चेतना जगाइ भ्रष्टाचार र बिकृति उन्मुलनका लागि परिवर्तनको बिगुल फुकेको निर्माण पक्ष्यको दाबी छ ।

कार्यक्रममा चलचित्रका निर्देशक रमेश कोइराला र कलकार दीपक अधिकारी पनि सहभागी थिए । त्यस अघि आज बिहान चलचित्रको प्रचार प्रसारका लागि अटोमा पोस्टर टाँसिएको थियो ।

कल्पना पौडेलको प्रस्तुति तथा म्याग्नोलिया ग्रुपको ब्यानरमा निर्माण भएको चलचित्रमा बेनिशा हमाल, नरेन खड्का,रमेश बुढाथोकी,नीर शाह,सरोज खनाल,हेमन्त बुढाथोकी,शिसिर वाङ्देल,बिनोद न्यौपाने,जेएन घिमीरे,गीता अधिकारी,मीरा पण्डित,मानश्री शर्मालगायतका कलाकारले अभिनय गरेका छन् ।