माओवादीको मध्यपहाडी लोकमार्ग अभियान पुनः सुरु

काठमाडौँ । नेकपा (माओवादी केन्द्र)ले शनिबारदेखि मध्यपहाडी लोकमार्ग अभियान फेरि सुरु गरेको छ । अभियानको सुरुवातका लागि पार्टी अध्यक्ष प्रचण्ड कास्कीको रुपा गाउँपालिका–१ स्थित शहीद पार्क पुगिसकेको प्रचण्ड सचिवालयले जनाएको छ।

माओवादीले गत जेठ २ गते बैतडीको पाटनबाट अभियान सुरु गरेको थियो । तर वर्षा सुरु भएपछि अभियान स्थगित गरिएको थियो । स्थायी समिति बैठकले बाँकी जिल्लामा भदौ २१ देखि फेरि अभियान अघि बढाउने निर्णय गरेको हो ।

कार्यक्रमअनुसार शनिबारदेखि सुरु भएको अभियान भदौ २२ गते लमजुङ, २३ गते गोरखा, २४ गते धादिङ र २५ गते नुवाकोटमा सम्पन्न हुने र त्यसपछि टोली काठमाडौं फर्किने माओवादीले जनाएको छ।