कविताको शिर्षक युवा चेतनाको उज्यालो

याम बहादुर थापा मगर

बागलुङ नगरपालिका १० भकुण्डे धौलेचउर बागलुङ

अगष्ट १२—अन्तर्राष्ट्रिय युवा दिवस,
विश्वभर एकैसाथ गुञ्जिन्छ
युवाको जोश, जाँगर र सम्भावनाको स्वर।
यो त केवल एक दिनको उत्सव होइन,
यो त मानव जीवनको त्यो सुनौलो उमेरको सम्मान हो।
जहाँ छ नेतृत्व गर्ने आँट,
जे पनि गर्न सक्छु भन्ने आत्मविश्वास,
र बदल्न सक्छु संसार भन्ने साहस।

व्यक्ति, परिवार, समुदाय, राष्ट्र
र सिङ्गो विश्वको विकासमा
युवाको भूमिका धड्कन झैँ अनिवार्य छ।
नयाँ सोच, नयाँ ऊर्जा, मौलिक विचार,
हक्की स्वभाव र न्यायको चाहना
यी सबै युवाको परिचय हुन्।
युवाले कलम समात्दा विचार बदल्छ,
उपकरण समात्दा प्रविधि बदल्छ,
र साहस समात्दा इतिहास बदल्छ।

तर इतिहास सजिलो थिएन ।
विगतमा युवाहरूले
स्वतन्त्रता, समानता र अधिकारका लागि
संघर्षको आँधी बेहोरे,
त्यो बिउबाट आजको चेतना उम्रियो।
नेपालका युवाले क्रान्तिका पानामा रगतले अक्षर कोरे,
र परिवर्तनका हरेक मोडमा
अग्रपंक्तिमा उभिए।

आज पनि चुनौतीहरू कम छैनन् ।
बेरोजगारीको दुश्चक्र,
विदेश पलायनको लहर,
प्रविधिको असमान पहुँच,
र नीतिगत उपेक्षा।
विश्वमा पनि
जलवायु परिवर्तनदेखि आर्थिक असमानतासम्म
युवाको काँधमै जिम्मेवारीको भारी छ।

तर समाधान पनि युवा मै छ ।
नवप्रवर्तनात्मक सोचलाई
सामाजिक र आर्थिक रूपान्तरणको इन्धन बनाऔं,
सहभागिता केवल नारामा होइन,
नीति निर्माणको केन्द्रमा पुर्याऔं।
शिक्षा र सीपलाई
रोजगारीसँग जोडेर
आफ्नै भूमिमा सम्भावना सिर्जना गराऔं।

किनकि युवा अवस्था केवल उमेरको कुरा होइन,
यो त सोच, साहस र संकल्पको नाम हो।
जब विश्वका युवाहरू
समान अवसर र साझा लक्ष्यका साथ अघि बढ्छन्,
त्यो दिन
अन्तर्राष्ट्रिय युवा दिवसको उज्यालो
बार्है महिना संसारमा फैलिनेछ।