टर्कीको विनाशकारी भूकम्पमा गुगलको चेतावनी प्रणाली असफल

अंकारा । गुगलले सन् २०२३ मा टर्कीमा आएको विनाशकारी भूकम्पका बेला आफ्नो भूकम्प प्रारम्भिक चेतावनी प्रणालीले सही ढङ्गले सतर्कता दिन नसकेको स्वीकार गरेको छ।

गुगलका अनुसार भूकम्प केन्द्रबिन्दुबाट ९८ माइल (१५८ किलोमिटर) भित्रका करिब १ करोड मानिसलाई ३५ सेकेन्डअघि नै उच्च सतर्कता पठाउन सकिने अवस्था भए पनि त्यस्तो चेतावनी केवल ४६९ जनालाई मात्र पठाइएको थियो। त्यस बेला करिब ५ लाख मानिसलाई भने हल्का कम्पनबारे चेतावनी दिने ‘लो–लेभल अलर्ट’ मात्र पठाइएको गुगलले जनाएको छ।

तर टर्कीमा आएको भूकम्पको तीव्रता प्रणालीले कम आँक्दा चेतावनी सही रूपमा पठाउन नसकेको गुगलले स्वीकार गरेको छ। “हामी प्रत्येक भूकम्पबाट सिकेर प्रणालीलाई अझै सुधार गरिरहेका छौँ,” गुगल प्रवक्ताले बीबीसीसँग भने।