हुम्लामा ट्याक्टर दुर्घटना हुँदा १३ जना घाइते

‎हुम्ला , साउन २ । सिमकोट गाउँपालिका- १ को दोजाम बैजीबाडामा ट्याक्टर दुर्घटना हुँदा १३ जना घाइते भएका छन् । सिमकोट गाउँपालिका-१ को दोजामबाट सिमकोट आउँदै गरेको ट्याक्टर दुर्घटना हुँदा १३ घाइते र १ जनाको अवस्था गम्भीर रहेको जिल्ला प्रहरी कार्यालय हुम्लाका डीएसपी शंकर पोखरेलले बताए ।

डीएसपी पोखरेलका अनुसार १५ जना सवार रहेको कर्णाली प्रदेश ०२००१ त ०३५३ नम्बर ट्याक्टर दोजाम बैजीबाडा नजिक दुर्घटना भएको हो ।

उनले भने, ‘जडीबुटी सकंलन गरी घर फर्किरहनु भएको रहेछ ।तर बीचमै दुर्घटना भएको छ। हामी उद्धार गरिरहेका छौं, ट्याक्टर खोलामा छ।’ ट्याक्टरमा चढेकाहरू खार्पुनाथ गाउँपालिका- ३ र सिमकोट गाउँपालिका-८ स्याडाका स्थानीय रहेको डिएसपी पोखरेलको भनाइ छ ।