भरतपुर मेयर कप : दोस्रो चरणको चार खेल सम्पन्न

चितवन । भरतपुर मेयर कप अन्तर विद्यालय फुटबल प्रतियोगियामा दोस्रो चरणको खेलहरु सुरु भएको छ । दोस्रो चरण अन्तर्गत आइतबार चार खेल सम्पन्न भएका छन् ।

प्रतियोगिता अन्तर्गत भरतपुर ७ कृष्णपुरको मैदानमा भएको खेलमा नेपाल पुलिस स्कुल विजयी भएको छ । उसले साविक विजेता अमर माविलाई हराएको हो । प्रतिस्पर्धात्मक खेलमा पुलिस स्कुलले अमर माविलाई टाइब्रेकरमा पराजित गरेको हो ।

कृष्णपुरमा नै भएको अर्को खेलमा दुर्गा शेषकान्त मावि विजयी भएको छ । दुर्गाशेषकान्त माविले चितवन बोर्डिङलाई २-१ ले हराएको हो । यस्तै सुन्दरबस्तीमा भएको खेलमा भानु मावि विजयी भयो । भानुले ग्रीनल्याण्ड पब्लिक स्कुलाई ३-१ ले हरायो ।

उता रामवेल मैदानमा भएको खेलमा डन एकेडेमी विजयी भएको छ । डन एकेडेमीले जनप्रिय स्कुललाई २-० ले पाखा लगायो । आज जित हात पारेका सबै टोली क्वाटरफाइनल प्रवेश गरेका छन् । प्रतियोगितामा सोमबार पनि चार खेल हुनेछ ।

चितवन जिल्ला फुटबल संघको आयोजना तथा भरतपुर महानगरपालिकाको प्रवर्द्धनमा सुरु भएको प्रतियोगितामा भरतपुर महानगरपालिका भित्रका २४ स्कुल सहभागी छन् । सेन्ट्रल कलेज प्रतियोगिताको मुख्य प्रायोजक रहेको छ ।