सामाजिक सुरक्षा कोषमा आवद्ध गराउन अभियान सञ्चालन गर्ने: पत्रकार महासंघ

काठमाडौं । नेपाल पत्रकार महासंघले श्रमजीवी पत्रकारलाई सामाजिक सुरक्षा कोषमा आवद्ध गराउन अभियान सञ्चालन गर्ने निर्णय गरेको छ । महासंघको बिहीबार र शुक्रबार पोखरामा सम्पन्न केन्द्रीय समिति बैठकले योगदानमा आधारित सामाजिक सुरक्षा कोषमा आवद्ध गराउन पहल गर्ने निर्णय गरेको हो ।

बैठकले कोषमा अनिवार्य आवद्ध गराउन कानूनी व्यवस्थाको लागि पहल गर्ने निर्णय गरेको महासंघका सचिव प्रकाश धौलाकोटीले जानकारी दिए । उनका अनुसार बैठकले नियमित पारिश्रमिक नदिने मिडियालाई असार मसान्तभित्र बक्यौता भुक्तानी गरिसक्न आग्रह गर्ने निर्णय गरेको छ भने पारिश्रमिक नदिने मिडियाविरुद्ध साउन १ गतेबाट आन्दोलन सुरु गर्ने निर्णय गरेको छ ।

बैठकले श्रमजीवी पत्रकार ऐनमा संशोधन सहित न्यूनतम पारिश्रमिक निर्धारण समितिको प्रतिवेदन कार्यान्वयनका लागि पहल गर्ने, मिडियामा देखिएको आर्थिक संकटलाई सम्बोधन गर्न विशेष नीति र कानुनी सुधारका लागि सरकारसँग आग्रह गर्ने निर्णय गरेको सचिव धौलाकोटीले बताए ।