बहुमत ल्याउन गाह्रो छ, धेरै सिट जित्नतिर लाग्नुस् : सभापति देउवा

काठमाडौं । सत्ता साझेदार नेपाली कांग्रेसका सभापति शेरबहादुर देउवाले नेताहरूका बीचको मतभेदलाई हटाएर मात्रै पार्टीलाई जीवन्त बनाउन सकिने बताएका छन् । ‘हामीबीचमा कतिपय कुराहरू नमिलेका हुन सक्छन् । तर आपसमा छलफल गरेर, मेलमिलाप गरेर नै मतभेदहरूलाई हटाएर पार्टीलाई जीवन्त बनाउनु पर्ने अहिलेको आवश्यकता रहेको छ,’ उनले भने ।

सभापति देउवाले वर्तमान दुई दलीय सरकारले नागरिकमाझ विश्वास पाउन सके मात्रै भविष्यमा पार्टीहरूप्रतिको विश्वास बलियो भएर जाने बताएका छन् । आज (सोमबार) भैरहवामा आयोजित कांग्रेसका क्षेत्रीय सभापतिहरूका लागि प्रशिक्षण कार्यक्रमको उद्घाटन गर्दै सभापति देउवाले वर्तमान संविधानमा आवश्यक संशोधनसहित पूर्ण कार्यान्वयन, गणतन्त्र र समावेशी व्यवस्थाको संस्थागत विकासका लागि कांग्रेस आफू रहेको बताए ।

‘अहिले दुई दलीय सरकार छ । यो सरकारको सफलताले हामीलाई लाभ हुनेछ । हामीले सरकार र सत्ता साझेदार दलहरूप्रति पनि इमान्दाररुपमा व्यवहार गर्नुपर्ने हुन्छ । सबै पार्टीहरूको सहयोगमा हामीले देशलाई अहिलेको अवस्थाबाट माथि उठाउन काम गर्नुपर्नेछ,’ देउवाले भने, ‘हामीले संघर्ष गरेर ल्याएको गणतन्त्र, समावेशी समानुपातिक व्यवस्था छ यसलाई संस्थागन गर्ने कुरामा समेत हाम्रो सक्रियता हुनुपर्दछ ।’

उनले नेपालको वर्तमान संविधानले सबै वर्ग, जातजाति र धर्म सम्प्रदायको अधिकारको सुनिश्चिता हुने अवस्था बनाएको भन्दै यसको कार्यान्वयनका लागि समेत पार्टीको जिम्मेवारी हुने बताए । उनले अहिलेकै अवस्थामा पार्टीले बहुमत ल्याउने अवस्था नभए पनि भविष्यमा पार्टीको राम्रो अवस्था हुने गरी काम गर्न निर्देशन दिंदै उनले अहिलेका लागि धेरै सिट जित्ने गरी लाग्नु पर्ने बताएका छन् ।