रारा ताल किनारको डाँफे होटलमा आगलागी

मुगु । मुगुस्थित रारा ताल किनारमा रहेको डाँफे होटलमा आगलागी भएको छ । बुधबार राति ११ बजेतिर आगलागी भएको सशस्त्र प्रहरीका केन्द्रीय प्रवक्ता डिआइजी कुमार न्यौपाने बताए । 

‘आएको पाहुनाहरू सबै सुतिसकेका रहेछन्, भान्साको काम सकेर होटेल कर्मचारी निस्कनुभयो,’ उनले भने, ‘त्यही भान्साबाट आगो सुरु भएर सबै सामानहरू जलेर नष्ट भयो । मानवीय क्षति भने भएको छैन ।’ उनका अनुसार नेपाल प्रहरी, सशस्त्र प्रहरी र नेपाली सेनाको टोली त्यहाँ पुगेर आगो नियन्त्रण गरिसकेको छ । नेपाल प्रहरीको टोलीले मुचुल्का उठाउने काम गरिरहेको छ । ‘म पन संयोगले यही आएको थिएँ, उनले भने, ‘के कति क्षति भयो भन्ने विस्तृत विवरण पछि आउला ।’

नजिकै ताल भएपनि सामग्री हुँदा नियन्त्रण गर्न कठिनाइ हुँदा सबै जलेर नष्ट हुन पुगेको उनले बताए । उक्त होटेल पूर्व सांसद गोपाल बमको हो । यो होटेल रारा ताल किनारको एकमात्र होटेल हो ।