चितवनको निर्माणाधीन क्रिकेट रंगशालामा अन्डर १६ क्रिकेट छनोट प्रतियोगिता मंगलबारबाट सुरु हुँदै

चितवन । चितवनको निर्माणाधीन गौतमबुद्ध अन्तर्राष्ट्रिय क्रिकेट रंगशालाको नमुना मैदानमा अन्डर १६ क्रिकेट छनोट प्रतियोगिता हुने भएको छ ।

बागमती प्रदेश क्रिकेट संघ र भरतपुर महानगरपालिकाको संयुक्त आयोजनामा भरतपुर मेयरकप वाग्मती प्रदेश अन्डर– १६ क्रिकेट छनोट प्रतियोगिता सञ्चालन हुने भएको हो ।

प्रतियोगिता यही वैशाख ४ गते (भोलि) देखि सुरु भएर वैशाख ७ गतेसम्म सञ्चालन हुनेछ । प्रतियोगितामा नेपाल क्रिकेट संघले मान्यता दिएका ६ जिल्ला टिमको सहभागिता रहनेछ । काठमाडौं, भक्तपुर र मकवानपुर समूह ‘ए’ मा छन् भने ललितपुर, चितवन र नुवाकोट समुह ‘बी मा छन् । प्रतियोगिता लिगका आधारमा खेलाइनेछ । दुई समूहबीचका समूह विजेता टोलीले फाइनलमा प्रतिस्पर्धा गर्नेछन् ।

विधागततर्फ म्यान अफ द सिरिज, म्यान अफ म्याच, बेष्ट ब्याटर र बेष्ट बलरलाई गिफ्ट ह्याम्परको व्यवस्था गरिएको वाग्मती प्रदेश क्रिकेट संघका अध्यक्ष राजु बस्न्यातले बताए । म्यान अफ म्याचको उपहार सौजन्य मन्च टाइम क्याफेले गर्नेछ । यस प्रतियोगितामा सहभागी खेलाडीमध्येबाट नै वाग्मती प्रदेशको अन्डर १६ को टोली तयार गरिनेछ । प्रतियोगिता सम्पन्न गर्न अनुमानित कुल ८ लाख खर्च हुने चितवन जिल्ला क्रिकेट संघका सचिव उमेश पियाले बताए । जिल्लामा क्रिकेट गतिविधि कम हुँदै गएकाले पनि यस किसिमको प्रतियोगिताले क्रिकेटलाई चलायमान बनाउने उनले बताए । उद्घाटन खेलमा भोलि काठमाडौं र भक्तपुर बिहान ८ बजे आमनेसामने हुनेछन् । प्रतियोगिताको उद्घाटन भरतपुर महानगरपालिकाका मेयर रेनु दाहालले गर्ने आयोजकले जनाएको छ ।