चुनावपछि गठबन्धनका पाण्डेलाई मुख्यमन्त्री र मलाई देशको नेतृत्व गर्ने अवसर छ : प्रचण्ड

गोरखा, कार्तिक १८ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले मंसिर ४ गतेको चुनावपछि आफू प्रधानमन्त्री र कांग्रेस नेता सुरेन्द्रराज पाण्डे गण्डकी प्रदेशको मुख्यमन्त्री हुने सम्भावना रहेको बताएका छन् ।

गोरखाको याङकोटमा आयोजित चुनावी सभालाई सम्बोधन गर्दै प्रचण्डले गोरखा २ बाट उम्मेदवार दिएका सबै आ–आफ्नो ठाउँबाट नेतृत्वमा पुग्ने अवस्था रहेको दाबी गरे । ‘गोरखाको जित संसारले देख्नुपर्छ । गोरखा त्यसैपनि संसार भर देखिन्छ पनि सुनिन्छ पनि । गोरखामा राम्रोसँग मतदान गरियौ भने एक ढिक्का भएर अगाडि बढ्यौ भने त्यो मतदानले एउटा शक्ति प्रधान गर्नेछ ।

उर्जा प्राप्त भएमा सुरेन्द्रराज पाण्डे प्रदेशको सदस्य मात्रै हुनुहुन्न । उहाँ प्रदेशको मुख्यमन्त्री हुने पुरै सम्भावना छ । फणिन्द्र देवकोटा प्रदेशको मन्त्री हुने पुरै सम्भावना छ’ प्रचण्डले भने, ‘मलाई देशको नेतृत्व लिने सम्भावना छ । तपाईहरुले हामीलाई बलियो बनाएर पठाउनुभयो भने सिंहदरबार र प्रदेशमा बलियो हुने अवस्था छ ।’ गोरखाबाट गठबन्धनका सबै उम्मेदवार निर्वाचित भएमा विकास र समृद्धिको यात्रा तिव्र गतिले अगाडि बढ्ने प्रचण्डले विश्वास व्यक्त गरे ।

गोरखामा मुख्य शक्ति माओवादी र कांग्रेस भएकाले दुई शक्ति मिलेमा असाधारण बहुमत आउने प्रचण्डले दाबी गरे । ‘अहिलेको निर्वाचनमा गठबन्धनको पक्षमा सिंगै देशले देख्नेगरी गोरखामा यस्तो रेकर्ड बन्यो भनेर देखाउनुपर्ने छ । गोरखामा अत्यधिक मत ल्याएर सबै उम्मेदवार विजयी भए भन्ने रेकर्ड बनाउन जरुरी छ’ उनले भने ।