प्रहरीद्वारा विराटनगरबाट ६१ किलो गाँजा बरामद

मोरङ, साउन १८ । प्रहरीले मोरङको विराटनगर महानगरपालिका – १४ जतुवाबाट ६१ किलो गाँजा बरामद गरेको छ । इलाका प्रहरी कार्यालय रानीबाट खटिएको टोलीले बुधबार दिउँसो प्लाष्टिकको पोका बनाएर सिटी सफारीमा लैजाँदै गरेको अवस्थामा गाँजा बरामद गरेको हो ।

प्रदेश १ प्रहरी कार्यालय विराटनगरका प्रहरी उपरीक्षक एवं प्रवक्ता नवीनराज राईले को २ ह ४६१० नम्बरको सिटी सफारीमा लोड गरी पश्चिमबाट पूर्वतर्फ लैजाँदै गरेको अवस्थामा गाँजा बरामद गरिएको जानकारी दिए । प्रहरीले गाँजा लोड गरिएको सफारीलाई नियन्त्रणमा लिएको छ । सफारीका चालक भने प्रहरीलाई देख्नासाथ फरार भए ।

सफारी कसको हो भन्ने खुल्न नसकेको प्रवक्ता राईको भनाइ छ । अहिले सफारी र गाँजाको मालिकबारे जानकारी लिने काम भइरहेको उनले बताए ।