अर्थमन्त्रीमा पुनर्बहाली पश्चात् शर्माले दिए गठबन्धनका नेताहरुलाई धन्यवाद

काठमाडौं । नवनियुक्त अर्थमन्त्री जनार्दन शर्माले बजेट कार्यान्वयन गर्ने अवसर दिएको भन्दै गठबन्धनलाई धन्यवाद दिएका छन् । आइतबार पदभार ग्रहण गर्ने क्रममा गठबन्धनका नेताहरूको नामै लिएर उनले धन्यवाद ज्ञापन गरेका हुन् ।

उनले सञ्चारकर्मीहरूसँग भने, ‘प्रधानमन्त्रीज्यू, पार्टी अध्यक्ष ज्यू, माधव नेपालज्यू, उपेन्द्र यादवज्यू, दुर्गा पौडेलज्यूलगायत गठबन्धनका सबैलाई धन्यवाद छ, मलाई बजेट कार्यान्वयन गर्ने अवसर दिनुभएकोमा ।’

आफूले ल्याएको बजेटको मूल उद्देश्य आयात प्रतिस्थापन र उत्पादन वृद्धि गर्दै वैदेशिक मुद्राको सञ्चिती बढाउनु रहेको उल्लेख गरे । बजेटमा योगदान गर्ने कर्मचारीहरूलाई पनि उनले धन्यवाद दिए ।

शर्माले यति बेला अर्थतन्त्रलाई सबलीकरण गर्नुपर्ने आवश्यकता रहेको भन्दै शर्माले बजेटले त्यही दिशामा लैजाने विश्वास व्यक्त गरे । आफ्नो मन्त्रालयको जिम्मामा रहेका कार्यलाई सम्पादन गर्न अहोरात्र लागिपर्ने उनले बताए ।