कञ्चनपुरमा ६ वर्षीया बालिका बलात्कृत, एक जना पक्राउ

कैलाली । कञ्चनपुरमा ६ वर्षिया बालिका बलात्कृत भएकी छन् । जिल्लाको लालझाडी गाउँपालिका–६ ढक्का शिविरमा बस्दै आएकी बालिका बुधबार बलात्कृत भएको जिल्ला प्रहरी कार्यालय कञ्चनपुरले जानकारी दिएको छ ।

बालिका बलात्कार गरेको आरोपमा प्रहरीले सोही ठाउँका १५ वर्षीय एक किशोरलाई पक्राउ गरेको छ । किशोरले आफ्नै घरमा बालिकालाई बोलाएर बलात्कार गरेको जिल्ला प्रहरी कार्यालय कञ्चनपुरका प्रवक्ता प्रहरी नायव उपरीक्षक चक्र बहादुर शाहले जानकारी दिए ।

बालिकाको गोप्य अङ्गबाट रगत बग्न थालेपछि उनका अभिभावकले घटनाबारे थाहा पाएका थिए । प्रहरीले एक दिन पछि घटनामा संलग्न रहेको आरोप लागेको व्यक्तिलाई पक्राउ गरेको हो । बलात्कारको आरोप लागेका किशोरलाई इलाका प्रहरी कार्यालय बेलौरीमा राखेर प्रहरीले अनुसन्धान गरिरहेको छ भने बालिकालाई उपचारको लागि महाकाली अस्पताल ल्याइएको शाहले जानकारी दिए ।