काभ्रेमा मतदानस्थल–मतदान केन्द्र हेरफेर प्रक्रिया अघि बढाइँदै

काभ्रेपलान्चोक । निर्वाचन आयोगले मतदाता नामावली अद्यावधिकलगायतका निर्वाचनलक्षित प्रक्रिया अघि बढाइरहेका बेला काभ्रेपलान्चोकमा पनि विगतका मतदानस्थल र मतदान केन्द्र पुनरावलोकन प्रक्रिया अघि बढाइने भएको छ । यसका लागि जिल्लास्थित मतदानस्थल तथा मतदान केन्द्र निर्धारण तथा सिफारिस समितिले बैठकमार्फत पुनरावलोकन प्रक्रिया र कार्य तालिका तय गरेको छ ।

समितिले मतदानस्थल तथा मतदान केन्द्र पुनरावलोकन कार्यक्रम, २०८३ अनुसार गत भदौ १५ गतेसम्म सङ्कलित तथा अद्यावधिक गरी असोज ३० गते प्रकाशित मतदाता नामावलीलाई मतदानस्थल पुनरावलोकनको आधिकारिक आधार बनाउने निर्णय गरेको छ । समितिका संयोजक एवं प्रमुख जिल्ला अधिकारी गोपालकुमार अधिकारीले जिल्लामा क्रियाशील राजनीतिक दललाई आगामी मङ्सिर १ गतेभित्र हाल कायम मतदानस्थलको सूचीसहित पत्राचार गरी पुनरावलोकन तथा आवश्यक सिफारिसका सम्बन्धमा राय–सुझाव माग्ने निर्णय गरिएको जानकारी दिए ।

त्यसैगरी, मङ्सिर २९ गतेभित्र वडा समितिबाट प्राप्त सिफारिसको एकीकृत विवरण तयार गरी जिल्ला मतदानस्थल तथा मतदान केन्द्र सिफारिस समितिको बैठकमार्फत विस्तृत अध्ययन गरिनेछ भने आवश्यकताका आधारमा स्थलगत अध्ययनसमेत गरी मतदानस्थल सिफारिससम्बन्धी अन्तिम निर्णय गरिने प्रजिअ अधिकारीको भनाइ छ ।

जिल्ला सिफारिस समितिले गरेको अन्तिम निर्णय तथा आवश्यक अनुसूची फाराम प्रमाणित गरी आगामी पुस ५ गतेभित्र निर्वाचन आयोगमा पठाउने कार्य तालिका तय गरिएको छ । यसैबिच समितिले स्थानीय तह, राजनीतिक दल तथा सम्बन्धित सरोकारवालाको सुझावलाई समेत समेटेर मतदानस्थल र मतदान केन्द्रलाई थप व्यवस्थित, सहज र मतदातामैत्री बनाउने उद्देश्य राखेको जनाएको छ ।

गत वर्ष फागुनमा सम्पन्न प्रतिनिधिसभा सदस्य निर्वाचनमा दुई प्रतिनिधिसभा निर्वाचन क्षेत्र रहेको काभ्रेपलान्चोकमा ८८ मतदानस्थललाई ‘संवेदनशील’का रूपमा हेरिएको थियो । यसमध्ये पनि २३ वटा मतदानस्थल ‘अतिसंवेदनशील’का रुपमा हेरी सोहीअनुसार सुरक्षा समितिले सुरक्षा–व्यवस्था मिलाएको थियो । जिल्लामा १०१ मतदानस्थल भने सामान्य रूपमा हरिएको थियो ।

जिल्लाका दुई प्रतिनिधिसभा निर्वाचन क्षेत्रमा १८९ मतदानस्थल र ४०० मतदान केन्द्र कायम गरिएको थियो । दुवै निर्वाचन क्षेत्र सशस्त्र प्रहरीको प्रहरी नायब उपरीक्षकको कमाण्डमा दुई वटा सुरक्षा बेसक्याम्प क्षेत्र नं १ को पनौती नगरपालिका–५ स्थित सुरक्षा मुद्रण केन्द्रको परिसर तथा २ नं क्षेत्रको मुख्य निर्वाचनको कार्यालय धुलिखेलस्थित शैक्षिक तालिम केन्द्रमा स्थापना गरी खटाइएको थियो ।

काभ्रेपलान्चोकमा पछिल्लो अद्यावधिक विवरणअनुसार तीन लाख २४ हजार नौ मतदाता छन् । निर्वाचन आयोगको मतदाता अद्यावधिक गर्ने प्रक्रियाअनुसार त्यसअघिको कुल सङ्ख्यामा काभ्रेपलान्चोक दुई हजार ६०२ मतदाताको नाम नामावलीबाट हटाइएको जिल्ला निर्वाचन कार्यालय धुलिखेलले जनाएको छ । कार्यालयका अनुसार जिल्लास्थित १३ स्थानीय तहमा दोहोरो दर्ताका कारण एक हजार १९८, मृत्यु भएका एक हजार ४०२ र नागरिकता परित्यागका दुई जनाको नाम नामावलीबाट हटाइएको हो ।