जेएनयू विद्यार्थी संघ चुनाव: अध्यक्षसहित तीन पदमा वामपन्थी विजयी

नयाँ दिल्ली । दिल्लीको जवाहरलाल नेहरू विश्वविद्यालयको विद्यार्थी संघको चुनावमा एआईएसए-डीएसएफ गठबन्धनका उम्मेदवार नीतीश कुमारले अध्यक्ष पद जितेका छन्। यस पदको मतगणनामा एबीभीपी उम्मेदवार शिखा स्वराज लामो समयदेखि अगाडि थिइन्।

यससँगै, जेएनयू विद्यार्थी संघका तीन प्रमुख पदहरूमा वामपन्थी विद्यार्थी संगठनका उम्मेदवारहरूले जित हासिल गरेका छन् । यसमा अध्यक्ष, उपाध्यक्ष र महासचिव पदहरू समावेश छन् भने सहसचिव पद एबीभीपीको पोल्टामा गएको छ।

यस पटक, जेएनयूएसयूमा २०२४-२५ को चुनावमा, लगभग ७० प्रतिशत मतदान भएको छ। यो गत वर्षको चुनावभन्दा अलि कम हो। समाचार एजेन्सी पीटीआईका अनुसार ७,९०६ मतदातामध्ये ५,५०० मतदाताले आफ्नो मताधिकार प्रयोग गरेका थिए ।

जेएनयू विद्यार्थी संघको चुनावको लागि मतदान २५ अप्रिल, अर्थात् शुक्रबार भएको थियो । त्यसपछि मतगणना सुरु गरिएको थियो।

यस चुनावमा, वामपन्थी दलहरूको विद्यार्थी संगठनहरूको पुरानो गठबन्धन धेरै हदसम्म विघटित देखिन्थ्यो। आठ वर्षदेखि सँगै रहेका एआईएसए , एसएफआई र अन्य दलहरूले छुट्टाछुट्टै चुनाव लडेका थिए।

जेएनयूएसयूका पूर्व अध्यक्ष एन साई बालाजीले बीबीसीलाई बताएअनुसार यस पटकको चुनावअघि एसएफआई र एआईएसए अलग भएका थिए – सामान्यतया २०१६ देखि वाम गठबन्धन एकसाथ थिए । यसपटक भने विभिन्न विद्यार्थी संगठनका उम्मेदवारहरूले फरक-फरक पदका लागि प्रतिस्पर्धा गरेका थिए।